Кніжна-ілюстрацыйная выстава выяўленчых выданняў “Мастак – сама прырода: садова-паркавае мастацтва” праходзіць з 16 чэрвеня па 20 жніўня ў зале дакументаў па мастацтве (пам. 306).
Не то, что мните вы, природа:
Не слепок, не бездушный лик –
В ней есть душа, в ней есть свобода,
В ней есть любовь, в ней есть язык.
Фёдар Цютчаў
Садова-паркавае мастацтва – адзін з найбольш складаных і шматгранных відаў мастацтва, своеасаблівае злучэнне садаводства, архітэктуры, скульптуры, жывапісу, паэзіі, рэлігіі, філасофіі... Майстэрства стварэння садоў бярэ пачатак у старажытных часах: вісячыя сады Вавілона, сады Персіі, Егіпта, Кітая, маўрытанскія сады Іспаніі, сярэднявечныя арабскія сады...
Высокага развіцця садовае мастацтва дасягнула ў эпоху Адраджэння, калі італьянскі архітэктар Джакама Бароцы ды Віньёла распрацаваў першую ў гісторыі канцэпцыю рэгулярнага саду. Сапраўдны росквіт садова-паркавага мастацтва прыйшоўся на перыяд барока і класіцызму дзякуючы найвялікшаму садоваму архітэктару XVII стагоддзя Андрэ Ленотру, які стаяў на чале стварэння і рэканструкцыі знакамітых каралеўскіх садоў Францыі. Цікава, што ў кожную эпоху сад падкрэсліваў яднанне чалавека з прыродай і, нібы люстэрка, паказваў свет і яго змены, уменні і дасягненні людзей, развіццё тэхналогій, навукі, культуры. Адзінокія, забаўляльныя, экзатычныя, ідылічныя, парадныя сады знакамітых палацаў з іх алеямі і альтанкамі, фантанамі і скульптурамі, мастамі і гротамі ствараліся таленавітымі майстрамі розных краін і эпох.
У нашы дні існуе мноства прыёмаў стварэння садоў і паркаў: камбінаваныя канструкцыі, жывыя загарадзі, тапіярныя фігуры з раслін, дрэвы, пасаджаныя пад нахілам. Спецыялісты па ландшафтным дызайне ствараюць садовыя кампазіцыі ў англійскім, галандскім, альпійскім, кітайскім, японскім, міжземнаморскім стылях. Аднак па-ранейшаму пераважаюць рэгулярныя (геаметрычныя) і пейзажныя паркі, якія імітуюць натуральны прыродны ландшафт.
Кнігі і альбомы з фондаў Нацыянальнай бібліятэкі, пачынаючы з выданняў 1950-х гадоў да самых сучасных, дэманструюць найбольш вядомыя сады і паркі свету. Сярод іх англійскія і італьянскія паркі, знакамітыя сады і парк Версаля, сад Цюільры, Люксембургскі сад (Францыя), парк Сан-Сусі ў Патсдаме (Германія), парк Шонбрун (Аўстрыя), сады Альгамбры ў Гранадзе і парк Гуэль архітэктара Антоніа Гаўдзі ў Барселоне (Іспанія), парк і сады Пецяргофа, Аляксандраўскі парк у Царскім сяле (Расія). Выклікаюць цікавасць фатаграфіі і кнігі аб уладкаванні паркаў Польшчы, Латвіі, Чэхіі, Грузіі, Азербайджана. Варта ўбачыць фатаграфіі садоў Карэі, Кітая, Японіі – прыклады пейзажных паркаў, якія захоўваюць непаўторную натуральнасць прыроды і дазваляюць адчуць гармонію з ёй.
Значная частка экспазіцыі прысвечана садова-паркаваму мастацтву Беларусі: прыцягнуць увагу матэрыялы аб парку “Альба” ў Нясвіжы, які фарміраваўся як летняя рэзідэнцыя Радзівілаў, аб сядзібным парку Агінскіх у Залессі, Гомельскім палацава-паркавым ансамблі, Лошыцкім парку. З кніг беларускіх навукоўцаў А. Федарука, А. Кулагіна, М. Півавара, прысвечаных сядзібам Мінскага краю, Віцебшчыны, Гродзеншчыны, Берасцейшчыны, наведвальнікі змогуць даведацца аб незахаванай сядзібна-паркавай спадчыне Беларусі, знайсці знаёмыя і родныя мясціны, дзе некалі стаяў водар садоў, а беларускія магнаты шпацыравалі па паркавых алеях.
Дапаўняюць экспазіцыю кнігі і часопісы пра добраўпарадкаванне дачных участкаў, разнастайная вучэбная літаратура, якая дапаможа асвоіць асновы сучаснага ландшафтнага дызайну і прымяняць іх на практыцы.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 53.
Матэрыял пададзены аддзелам абслугоўвання спецыялізаванымі фондамі.