З 23 лютага па 25 сакавіка 2008 года ў зале выяўленчых і відэадакументаў (пам. 307) праходзіць выстаўка "Магія чорнага квадрата", прысвечаная 130-годдзю з дня нараджэння Казіміра Севярынавіча Малевіча, рускага мастака, тэарэтыка мастацтва, аднаго з лідэраў авангардызму 1910 - 1935 гг. і заснавальніка абстрактнага мастацтва і супрэматызму.
Сярод найбольш бескампрамісных наватараў, якія сваёй творчасцю вызначылі прынцыпова новыя напрамкі і задачы сучаснага мастацтва, - Казімір Севярынавіч Малевіч - сусветна вядомы мастак, тэарэтык авангарда, родапачынальнік рэвалюцыйнай мастацкай адукацыі.
К. Малевіч зацвердзіў новую і арыгінальную канцэпцыю творчасці, да якой ён ішоў не адно дзесяцігоддзе, мінуючы шматлікія мастацкія стылі: ад рэалізму ХIХ стагоддзя, мадэрнізму, імпрэсіянізму, сімвалізму, неапрымітывізму, кубізму, кубафутурыстычнага рэалізму да супрэматызму.
Прапанаваная выстаўка - спроба разгледзець мастацтва Малевіча ва ўсёй шматграннасці, раскрыць асаблівасці і характар мастацкай, тэарэтычнай і літаратурнай творчасці мастака-мысліцеля. У сваіх творах - жывапісу, графіцы, архітэктуры, тэатральна-дэкарацыйным, дэкаратыўна-прыкладным мастацтве, паэзіі - Малевіч гаворыць мовай пластычнай формы, зачароўваючы чысцінёй фарбаў, магіяй ліній, трансфармуючы палёт творчай думкі ў форму.
На выстаўцы прадстаўлена звыш 150-ці дакументаў. Гэта - альбомы, кнігі, артыкулы, рэпрадукцыі і плакаты. Экспазіцыя будзе цікавая шырокаму колу чытачоў.
Кантактны тэлефон: 293-27-53