З 17 сакавіка па 15 красавіка 2008 года ў зале беларускай літаратуры (пам. 205) праходзіць юбілейная кніжная выстаўка «Лірычнасць і грамадзянскасць», прысвечаная 60-годдзю Генадзя Пятровіча Пашкова, беларускага паэта, перакладчыка, публіцыста, члена-карэспандэнта Міжнароднай Славянскай Акадэміі навук, адукацыі, мастацтваў і культуры (1996), лаўрэата прэміі Ленінскага камсамола Беларусі (1980), Дзяржаўнай прэміі Рэспублікі Беларусь (1998).
Творчасці Г. Пашкова ўласцівы грамадзянскі пафас, філасафічнасць, асацыятыўнасць, разнастайнасць рытміка-інтанацыйных і вобразных сродкаў, багацце моўнай палітры. У творах аўтара арганічна спалучаюцца тонкая лірычнасць і грамадзянскасць, адчуваецца глыбокая любоў аўтара да людзей, да мясцін з маляўнічымі краявідамі і, адначасова, заклапочанасць пра будучыню, гісторыю, культуру і прыроду роднай зямлі, роздум пра жыццё і яго сэнс, а таксама асэнсаванне асабіста ўбачанага, перажытага.
У раздзеле «Звонкі і чысты голас» прадстаўлены асобныя выданні твораў Г. Пашкова. Сярод іх паэтычныя зборнікі «Кляновік» (1975), «Дыстанцыя небяспекі» (1979), «Гравюры дарог» (1981), «Зямлю слухаю» (1983), «Крокі» (1988), «Люблю, спадзяюся, жыву…» (1990), «Журавінавы востраў» (1998) «Тваім святлом благаславёны» (2006), празаічныя зборнікі «Будзень як свята» (1977), «Палескія вандроўнікі» (1998), зборнікі для дзяцей «Дзяўчынка з блакітным мячыкам» (1986), «Пціч» (1991), «Зорнае поле» (1999).
У экспазіцыі шырока прадстаўлены публікацыіаўтара, якія змешчаны ў калектыўных зборніках і часопісах.
Асобным раздзелам на выстаўцы прадстаўлены энцыклапедычныя і даведачныя выданні, што выйшлі ў выдавецтве «Беларуская энцыклапедыя», у падрыхтоўцы і выданні якіх прымаў удзел Генадзь Пятровіч. З 1996 г. ён з’яўляецца галоўным рэдактарам гэтага выдавецтва. У шэрагу прадстаўленых прац – «Беларуская энцыклапедыя» ў 18-ці т. (1996–2004), «Энцыклапедыя гісторыі Беларусі» ў 6-ці т. (1993–2003), энцыклапедыі«Вялікае княства Літоўскае» ў 2-х т. (2005–2006), «Тэатральная Беларусь» у 2-х т. (2002–2003), «Беларускі фальклор» у 2-х т. (2005–2006) і іншыя.
Адзін з раздзелаў экспазіцыі прысвечаны перакладам. Ён знаёміць наведвальнікаў выстаўкі з перакладамі Г. Пашкова на беларускую мову асобных твораў азербайджанскіх, армянскіх, латышскіх, рускіх, таджыкскіх, украінскіх паэтаў.
Апошні раздзел «Шчасце світальных дарог» змяшчае публікацыі пра жыццё і творчасць юбіляра.
Выстаўка багата ілюстравана фотаздымкамі аўтара.
Кантактны тэлефон: 293-27-16
 |
 |
 |
 |
 |
 |
