З 25 сакавіка Нацыянальная бібліятэка Беларусі прапануе тэматычную кніжную выстаўку «Частка свету...тэатр», прысвечаную Міжнароднаму дню тэатра.
Тэатр – найстаражытнейшае мастацтва. Чалавечая памяць захоўвае ўяўленне аб велічы тэатраў самых розных эпох. Вялікія і малыя, што існуюць некалькі стагоддзяў і паміраюць праз некалькі сезонаў, традыцыйныя і эксперыментальныя, камерныя і фестывальныя, народныя і багемныя, народжаныя катаклізмамі гісторыі і створаныя прыватнымі ўладальнікамі – усе яны засталіся ў памяці культуры і гісторыі першым чынам таму, што ўяўлялі сабой асаблівае мастацкае цэлае, што гулялі ў іх выдатныя акцёры, танцавалі выдатныя танцоры, а спектаклі ставілі выдатныя рэжысёры.
У экспазіцыі сабраны матэрыялы, у якіх праз прызму гісторыі выдатных тэатраў паказана гісторыя сусветнага тэатра. У энцыклапедыях, навуковых манаграфіях, матэрыялах канферэнцый разгледжаны праблемы гісторыі тэатраў розных краін і народаў, даследаваны актуальныя тэндэнцыі сучаснага тэатральнага працэсу. Выстаўка налічае каля 400 дакументаў, сярод якіх:
- кнігі аб жыцці і творчасці вядомых айчынных і замежных акцёраў, рэжысёраў і драматургаў;
- электронная энцыклапедыя «Театр» у 3-х тамах («Балет», «Опера», «Драма»), CD-ROM «Мир театра, балета, кино»;
- зборнікі дакладаў удзельнікаў навуковых чытанняў «Театральная книга между прошлым и будущим», праведзеных Расійскай дзяржаўнай бібліятэкай па мастацтве;
- дакументальная хроніка тэатральнага жыцця Расіі ў эпоху Лізаветы Пятроўны (ХVIII ст.);
- тэатральная культура Срэбнага веку ў Расіі (ХХ ст.);
- публікацыя дзённікаў дырэктара Імператарскіх тэатраў У.А.Целякоўскага (пач. ХХ ст.), дзе прадстаўлены штодзённы летапіс жыцця пецярбургскіх тэатраў – Марыінскага, Александрыйскага і Міхайлаўскага, адлюстраваны адносіны імператарскага двара і царскай фаміліі да тэатра.
У заключным раздзеле экспазіцыі прасочаны асноўныя этапы развіцця тэатральнага мастацтва на Беларусі ад яго народных вытокаў да сучаснасці. Тут асветлены творчы шлях асобных тэатраў, ахарактарызаваны асаблівасці майстэрства вядомых драматургаў і майстроў сцэны, зроблены аналіз спектакляў.
Выстаўка размешчана ў кальцавым калідоры 3-га паверха, разлічана на аматараў тэатральнага мастацтва.
Кантактны тэлефон 293-28-86.
 |
 |
 |
 |
 |
 |
 |
 |
 |
