З 8 па 28 красавіка ў зале дакументаў па мастацтве (пам. 306) праходзіць кніжна-ілюстрацыйная выстаўка “Касмічныя вандроўкі”, прысвечаная Дню касманаўтыкі.
Са старажытных часоў погляды людзей накіроўваліся ў таямнічае і чароўнае зорнае неба. Сонца і Месяц, планеты і сузор’і вабілі сваёй невядомасцю і выклікалі мноства пытанняў. З часам заслона касмічнай таямніцы пачала прыадчыняцца з дапамогай астраноміі і навуковых адкрыццяў выбітных вучоных: Піфагора, Арыстоцеля, К. Пталемея, М. Каперніка, Г. Галілея, І. Кеплера, І. Ньютана, А. Эйнштэйна...
У сярэдзіне ХХ стагоддзя мары пра космас сталі рэальнасцю: у 1957 годзе Сяргей Каралёў запусціў першы штучны спадарожнік Зямлі, а 12 красавіка 1961 года Юрый Гагарын здзейсніў першы арбітальны палёт.
Астраномія, нябесныя целы і касмічныя падарожжы прыцягвалі ўвагу не толькі вучоных. На выстаўцы прадстаўлены рэпрадукцыі карцін мастакоў розных эпох і стыляў, сярод якіх “Млечны шлях” Тынтарэта, “Астраном” Вермеера, “Зорная ноч” Ван Гога, цыкл “Стварэнне свету” М. Чурлёніса, “Новая планета” К. Юона, серыя “Прастора” Н. Ганчаровай, ілюстрацыі Сент-Экзюперы да яго аповесці-казкі “Маленькі прынц”. Наведвальнікі ўбачаць рэпрадукцыі твораў савецкіх мастакоў, сведак і сучаснікаў зараджэння касмічнай эры: А. Дэйнекі, Ю. Пахадаева, В. Васіленкі, В. Віктарава. Цікавасць выклічуць выяўленчыя матэрыялы, якія прадстаўляюць работы касманаўтаў А. Лявонава і У. Джанібекава.
Тэма космасу атрымала яркае ўвасабленне і ў беларускім мастацтве, у прыватнасці, у творчасці Язэпа Драздовіча. Прыцягнуць увагу альбомы рэпрадукцый, манаграфіі, артыкулы пра мастака, а таксама яго ўнікальная кніга “Нябесныя бегі” – першае даследаванне па астраноміі на беларускай мове. Таксама будзе прадстаўлена інфармацыя аб “касмічным скульптары” Іване Міско і галерэі створаных ім вобразаў заваёўнікаў космасу.
У экспазіцыю ўключаны шэраг артыкулаў пра ўвасабленне касмічнай тэматыкі ў кінамастацтве на прыкладзе фільмаў “Зорныя войны”, “Гравітацыя”, “Гагарын. Першы ў космасе”, “Салют-7”, “Час першых”.
Дапаўняюць выстаўку маляўнічыя фотаальбомы з унікальнымі фатаграфіямі з Міжнароднай касмічнай станцыі, а таксама астрафатаграфіі беларускага астранома Віктара Малышчыца.
Усяго экспазіцыя налічвае больш за 50 дакументаў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 53.
Матэрыял прадастаўлены аддзелам абслугоўвання спецыялізаванымі фондамі.
