З 17 красавіка па 15 мая ў зале дакументаў міжнародных арганізацый (пам. 207g) адкрыта выстаўка “Інтэлектуальная ўласнасць: абарона, праблемы, перспектывы”.
Выстаўка прысвечана Міжнароднаму дню інтэлектуальнай уласнасці, які быў заснаваны Генеральнай асамблеяй Сусветнай арганізацыі інтэлектуальнай уласнасці ў верасні 2000 г. Пачынаючы з 2001 г., гэты Дзень штогод адзначаецца 26 красавіка. Дата міжнароднага свята была абрана не выпадкова. Менавіта ў гэты дзень у 1970 г. уступіла ў сілу міжнародная канвенцыя, паводле якой была заснавана “Сусветная арганізацыя інтэлектуальнай уласнасці” (САІУ) – спецыялізаваная ўстанова Арганізацыі Аб’яднаных Нацый. Дзейнасць САІУ прысвечана развіццю збалансаванай і даступнай міжнароднай сістэмы інтэлектуальнай уласнасці (ІУ), якая забяспечвае ўзнагароду за творчую дзейнасць, стымулюе інавацыі і ўносіць уклад у развіццё грамадства. На дадзены момант членамі арганізацыі з’яўляюцца 185 дзяржаў, або звыш 90 % краін.
САІУ і яе дзяржавы-члены штогод адзначаюць Міжнародны дзень інтэлектуальнай уласнасці, праводзячы прымеркаваныя да гэтай даты сустрэчы, мерапрыемствы і кампаніі. Іх мэта – дабіцца лепшага разумення таго, што рэальна ўяўляе сабой ІУ, і паказаць, якім чынам сістэма ІУ спрыяе не толькі развіццю музыкі, мастацтва і індустрыі забаў, але і стварэнню ўсіх тавараў і інавацыйных тэхналогій, што вызначаюць аблічча навакольнага свету.
Увасабляючы свае крэатыўныя і інавацыйныя таленты ў тварэнні сусветнага ўзроўню, вынаходнікі, рацыяналізатары, дзеячы літаратуры і мастацтва не толькі ствараюць высокатэхналагічныя вырабы і яркія мастацкія творы, якія робяць наша жыццё сучасным і разнастайным, але і ўносяць велізарны ўклад у фарміраванне сучаснай эканомікі і ўстойлівага сацыяльна-эканамічнага развіцця грамадства. У гэтай сувязі падтрымка вынаходніцтва, творчасці і фарміраванне эфектыўнай сістэмы аховы інтэлектуальнай уласнасці становяцца аднымі з важных фактараў, якія вызначаюць становішча любой краіны ў свеце. Надзейны ўзровень абароны інтэлектуальнай уласнасці стымулюе навуковыя даследаванні, развіццё культуры, літаратуры і мастацтва, практычнае выкарыстанне дасягненняў навукі і тэхнікі, а таксама міжнародны абмен імі.
У Рэспубліцы Беларусь функцыянуе эфектыўная сістэма аховы інтэлектуальнай уласнасці. Наша краіна з’яўляецца ўдзельніцай 17 шматбаковых міжнародных дагавораў, якія дзейнічаюць пад эгідай САІУ, а таксама шэрагу шматбаковых міжнародных дагавораў, заключаных у рамках СНД, у галіне аховы прамысловай уласнасці, аўтарскага права і сумежных праў.
З лістапада 2010 г. Нацыянальная бібліятэка Беларусі стала бібліятэкай – дэпазітарыем дакументаў САІУ. Прапанаваная тэматычная выстаўка пазнаёміць з дзейнасцю гэтай арганізацыі і з яе дакументамі, сярод якіх матэрыялы па міжнародным заканадаўстве ў сферы інтэлектуальнай уласнасці (канвенцыі, дагаворы, пагадненні), літаратура па аўтарскім праве, патэнтах і таварных знаках, штогадовыя справаздачы і кароткія агляды САІУ.
Экспазіцыя ўключае наступныя тэматычныя раздзелы:
- Інтэлектуальная ўласнасць: роля і месца ў развіцці сучаснага грамадства.
- Міжнароднае заканадаўства ў галіне інтэлектуальнай уласнасці. Дзейнасць САІУ.
- Прамысловая ўласнасць і патэнтнае права.
- Аўтарскае права і сумежныя правы.
- Ахова інтэлектуальнай уласнасці ў Рэспубліцы Беларусь.
На выстаўцы прадстаўлена больш за 60 дакументаў на рускай і англійскай мовах: кнігі, брашуры, перыядычныя выданні.
Выстаўка будзе цікавая студэнтам, аспірантам, выкладчыкам юрыдычных і эканамічных факультэтаў, кіраўнікам прадпрыемстваў, супрацоўнікам навукова-даследчых і прыкладных інстытутаў, юрысконсультам і ўсім, хто цікавіцца праблемамі інтэлектуальнай уласнасці.
Карысныя спасылкі
- Міжнародны дзень інтэлектуальнай уласнасці
- Аб інтэлектуальнай уласнасці
- Вынаходніцтвы (патэнты)
- Таварныя знакі
- Прамысловыя ўзоры
- Геаграфічныя ўказанні
- Аўтарскае права і сумежныя правы
- ІУ ў паўсядзённым жыцці