З 12 па 31 жніўня ў зале беларускай літаратуры (пам. 205) праходзіць кніжная выстаўка “І вера, і каханне, і святло”, прысвечаная 60-годдзю Г. А. Каржанеўскай, беларускай паэтэсы, драматурга, крытыка.
На творчым рахунку Галіны Анатолеўны Каржанеўскай – шэраг паэтычных кніг, сярод якіх першым быў зборнік вершаў “На мове шчасця”, які выпусціла выдавецтва “Мастацкая літаратура” ў серыі “Першая кніга паэта” ў 1973 г. Пасля выйшлі кнігі лірыкі “Мой сад” (1976), “Званы гадоў” (1980), “Вечны водгук” (1988), “Асенні мёд” (1999) і інш.
Кожная кніга паэтэсы – гэта своеасаблівы лірычны дзённік, споведзь тонкай і чуллівай душы. “Мы нібыта чытаем раман-хроніку з жыцця сучаснай жанчыны”, – так трапна выказалася крытык Тамара Чобат пра зборнік Г. Каржанеўскай “Жыла-была...” (1983). І гэтыя словы можна аднесці ўвогуле да ўсіх яе кніг вершаў.На выстаўцы ў раздзелах “Рыфмы натхнення і любові”, “Г. Каржанеўская – драматург”, “Малечам пра рэчы... і не толькі” прадстаўлены выданні, якія раскрываюць шырокі творчы дыяпазон пісьменніцы: ад паэтычных да драматургічных твораў, ад вершаў, апавяданняў, п’ес і чытанак для дзяцей да дапаможнікаў для педагогаў дашкольных устаноў.
У раздзел “Свет жыцця і творчасці” ўключаны выданні і публікацыі, якія знаёмяць з поглядамі і развагамі літаратуразнаўцаў, крытыкаў, рэцэнзентаў на творчасць і асобу Г. Каржанеўскай.
Кантактны тэлефон: 293-27-16.