З 14 па 31 снежня 2007 года ў зале нотных і аўдыёдакументаў (пам. 305) праходзіць тэматычная выстаўка "І цуд адбудзецца!.. Музыка Каляд і Новага года".
У экспазіцыі - нотныя выданні і аўдыёдакументы, прадстаўленыя рознымі музычнымі жанрамі; кнігі, у якіх змешчана апісанне музычнага складніка зімовых свят, а таксама сцэнарыі дзіцячых навагодніх карнавалаў.
Без музыкі немагчыма ўявіць сабе ніводнае свята, тым больш шэраг урачыстасцей, закліканых перавесці нас са старога года ў новы. Звычай святкаваць Новы год існуе са спрадвечных часоў, па меншай меры 25 стагоддзяў, гэта значыць мае свой пачатак у традыцыях старажытных плямёнаў земляробаў. Пачатак новага працоўнага года яны звязвалі з днём зімовага сонцастаяння, 24 снежня, і ўслаўлялі Бога непераможнага сонца ў песнях і танцах.
Славянскія народы прынеслі ў Еўропу самабытныя абрады і святы, сярод якіх цэнтральнае месца занялі віншавальна-велічальныя песні.Яны суправаджалі абыход хат і сімвалізавалі прыход духаў продкаў. Напярэдадні Новага года, у шчодры вечар, пераапранутыя людзі спявалі шчадроўкі. У віншавальны ж абыход на Каляды выконваліся калядкі з пажаданнямі дабрабыту ў гаспадарцы і ўраджайнага года. Пасля прыняцця хрысціянства калядкі паступова насычаюцца сюжэтным матывам нараджэння Хрыста. А ў XVI-XVIII стст. ствараюцца ўжо аўтарскія калядкі, якія ў музычным плане набліжаюцца да лацінскіх гімнаў. Менавіта яны, захаваўшыся да нашых дзён, і з’яўляюцца музычным сімвалам цудоўнай каляднай ночы і зімовых свят ва ўсім свеце.
Апісаныя жанры прадстаўлены на выстаўцы як у народным, так і ў прафесійным кампазітарскім рашэнні і ўключаюць дакументы на замежных мовах. Сярод іх «Песні на Адвэнт і Божае нараджэнне», «Kolędy i pastorałki», калядныя спевы праваслаўнай царквы, навагоднія песні на грузінскай і венгерскай мовах, творы беларускіх кампазітараў Людмілы Шлег і Яўгенія Паплаўскага.
Уяўляе цікавасць вялікая колькасць кампакт-дыскаў і пласцінак, сярод якіх "Калядная араторыя" І.С. Баха і калядныя канцэрты кампазітараў эпохі барока, "Калядкі", "Rock Christmas". Варта звярнуць увагу на першыя выданні елкавых песенак (1936, 1937 і 1938 г.), на апісанні пастановак калядных сцэнак у Беларусі пачатку ХХ ст. і рэдкія выданні канца XIX ст. твораў Ц. Франка і К. Дэбюсі, прысвечаныя каляднай тэматыцы.
Кантактны тэлефон 293-27-52
Уяўляе цікавасць вялікая колькасць кампакт-дыскаў і пласцінак, сярод якіх "Калядная араторыя" І.С. Баха і калядныя канцэрты кампазітараў эпохі барока, "Калядкі", "Rock Christmas". Варта звярнуць увагу на першыя выданні елкавых песенак (1936, 1937 і 1938 г.), на апісанні пастановак калядных сцэнак у Беларусі пачатку ХХ ст. і рэдкія выданні канца XIX ст. твораў Ц. Франка і К. Дэбюсі, прысвечаныя каляднай тэматыцы.
Кантактны тэлефон 293-27-52
 |
 |
 |
 |
 |
 |
