З 1 ліпеня па 10 жніўня ў зале дакументаў па мастацтве (пам. 306) праходзіць тэматычная кніжна-ілюстрацыйная выстаўка “І ажываюць лялькі”.
Лялькі суправаджаюць нас усё жыццё. Дзецям дораць цацкі, водзяць на лялечныя спектаклі – яны забаўляюць, павучаюць, выхоўваюць. У жыцці дарослага чалавека лялькам таксама адведзена значнае месца: яны ўпрыгожваюць дом, служаць аб’ектам калекцыяніравання, добрым падарункам. А ужо калі лялька зроблена сваімі рукамі – цэннасць і значнасць такога падарунка невымерна ўзрастаюць.
Гледзячы на гэтыя цудоўныя стварэнні, пачынаеш сумнявацца, а ці лялькі гэта? Здаецца, яны вось-вось ажывуць – бо кожная з іх валодае непаўторным характарам, асобымі адметнымі рысамі, інтарэсамі і звычкамі.
Людзі глядзяць на лялек і часта бачаць у іх адлюстраванне саміх сябе. І калі змяняюцца людзі, змяняюцца і лялькі. М.Я. Салтыкоў-Шчадрын сцвярджаў, што з усіх існуючых у свеце загадак таямніца лялькі – самая загадкавая. Без разумення сутнасці лялькі немагчыма зразумець і чалавека.
Матэрыялы, прадстаўленыя на выстаўцы, апавядаюць пра дзівосны лёс лялькі і яе ролю ў гісторыі чалавецтва, пра звязаныя з ёю абрады і рытуалы і яе магічнае значэнне ў старажытнасці. У сучасным свеце лялька страціла містычныя ўласцівасці, ператварыўшыся ў дзіцячую цацку, тэатральную ляльку, дэкаратыўны прадмет інтэр’еру, сувенір, аб’ект калекцыяніравання, твор мастацтва. Пра гэтыя тыпы сучаснай лялькі раскажуць кнігі, альбомы, паштоўкі і рэпрадукцыі, прадстаўленыя ў адпаведных раздзелах экспазіцыі. У альбомах размешчаны і маляўнічыя ілюстрацыі, і падрабязныя схемы для стварэння лялек уласнымі рукамі.
Адзін з раздзелаў выстаўкі прысвечаны творчай біяграфіі знакамітага акцёра і рэжысёра лялечнага тэатра Сяргея Уладзіміравіча Абразцова (1901–1992). Сёлета адзначаецца 115-годдзе з дня нараджэння гэтага вядомага дзеяча тэатра лялек.
Усяго экспазіцыя налічвае звыш 60 дакументаў.
Кантактны тэлефон: (8 017) 293 27 53.