З 20 лістапада па 15 снежня 2009 года ў зале беларускай літаратуры (пам. 205) праходзіць юбілейная выстаўка "Геній трох народаў", прысвечаная 150-годдзю з дня нараджэння Мікалая Андрэевіча Янчука (1859–1921).
М.А. Янчук – выдатны беларускі, украінскі і расійскі вучоны-славіст, этнограф, фалькларыст, антраполаг, літаратуразнавец і пісьменнік.
Навуковыя працы вучонага сведчаць пра яго глыбокае тэарэтычнае асэнсаванне з’яў матэрыяльнай і духоўнай культуры. З вялікай павагай і зацікаўленасцю ставіўся Мікалай Андрэевіч да ўсяго народнага, вывучаў побыт і вуснапаэтычную творчасць рускага, украінскага і беларускага народаў. У многіх сваіх працах ён прыходзіць да высноў агульнаславянскага, а таксама агульнатэарэтычнага маштабу.
Навуковая спадчына М.А. Янчука не страціла сваёй значнасці і сёння. Яго працамі цікавяцца, іх вывучаюць. У першым раздзеле экспазіцыі "Цудоўныя скарбы" прадстаўлены асобна выдадзеныя працы аўтара "А.К. Киркор: краткий очерк жизни и деятельности" (1888), "По Минской губернии" (1889), "О мнимо-народных белорусских песнях исторического и мифологического содержания" (1908), "Нарысы па гісторыі беларускае літаратуры: старадаўны пэрыад" (1922) і іншыя, а таксама публікацыі аўтарскіх прац, якія змешчаны ў такіх часопісах і калектыўных зборніках, як "Древности" (1888), "Этнографическое обозрение" (1889, 1890, 1897, 1913), "Археологические известия и заметки" (1898 ), "Kraj" (1889, 1896, ...) , "Известия общества славянской культуры" (1912), "Курс белоруссоведения" (1918–1920) і інш.
У раздзеле экспануюцца працы іншых аўтараў, у падрыхтоўцы якіх М.А. Янчук прымаў удзел як рэдактар, складальнік, перакладчык.
Другі раздзел "Высокая місія народазнаўца" знаёміць з публікацыямі пра жыццё, навуковую і грамадскую дзейнасць вучонага. Артыкулы змешчаны ў энцыклапедычных выданнях, шматлікіх часопісах і калектыўных зборніках. У ліку прадстаўленых дакументаў кніга Г.А. Пятроўскай "Не погасла звезда: жизненный и творческий путь Н.А. Янчука" (1987).
Экспазіцыя змяшчае больш за 100 дакументаў.
Кантактны тэлефон: 293-27-16.