18–22 лістапада 2009 года ў Александрыйскай бібліятэцы (Арабская Рэспубліка Егіпет) прайшла Генеральная асамблея асацыяцыі eIFL.net.
У рабоце асамблеі прынялі ўдзел прадстаўнікі больш за 35 нацыянальных бібліятэчных кансорцыумаў з краін, што развіваюцца, і краін з пераходнай эканомікай.
На пасяджэннях абмяркоўваліся праблемы каардынацыі дзейнасці бібліятэк і нацыянальных кансорцыумаў па пытаннях ліквідацыі інфармацыйнай няроўнасці і арганізацыі доступу да электронных інфармацыйных рэсурсаў ў сферы навукі і адукацыі. Вялікая ўвага была нададзена пытанням пашырэння адкрытага доступу да электронных рэсурсаў і стварэння інстытуцыянальных архіваў навуковых прац і дысертацый.
З паведамленнем пра дзейнасць Нацыянальнай бібліятэкі Беларусі (НББ) выступіў нацыянальны каардынатар eIFL.net, загадчык сектара падтрымкі інфармацыйнага забеспячэння інавацыйнай дзейнасці аддзела карпаратыўнага ўзаемадзеяння НББ В.І. Брычкоўскі. Прадстаўнікі шэрага нацыянальных кансорцыумаў Еўропы праявілі цікавасць да інфармацыі аб дзейнасці бібліятэкі. Была абмеркавана магчымасць правядзення наступнага пасяджэння Генеральнай асамблеі асацыяцыі eIFL.net у Мінску.
Было аб’яўлена аб адкрыцці новай праграмы для публічных бібліятэк, накіраванай на прымяненне інавацыйных тэхналогій у арганізацыі інфармацыйнага бібліятэчнага абслугоўвання. Акрамя таго, прайшлі сустрэчы нацыянальных кансорцыумаў з прадстаўнікамі шэрага выдавецтваў і інфармацыйных службаў.
Асацыяцыя eIFL.net – некамерцыйная арганізацыя, якая аказвае дапамогу і ўсебаковую кансультацыйную падтрымку па пытаннях шырокага выкарыстання электронных рэсурсаў для чытачоў бібліятэк краін, што развіваюцца, і краін пераходнага перыяду.
На сённяшні дзень членамі eIFL.net з’яўляюцца 50 краін, што развіваюцца, і краін з пераходнай эканомікай Цэнтральнай, Усходняй і Паўднёва-Усходняй Еўропы, а таксама краін былога Савецкага Саюза, Афрыкі, Бліжняга Усходу і Паўднёва-Усходняй Азіі.
Галоўнымі напрамкамі дзейнасці eIFL.net з’яўляюцца развіццё бібліятэчных кансорцыумаў, падтрымка абмену ведамі ў глабальным маштабе і пабудова сеткі бесперапыннага павышэння адукацыі па такіх кірунках, як адкрыты доступ да публікацый, права інтэлектуальнай уласнасці, праграмнае забеспячэнне з адкрытым кодам для бібліятэк і стварэнне інстытуцыянальных рэпазіторыяў (архіваў) з лакальным кантэкстам.