Кніжна-дакументальная выстава “Генацыд: трагічныя старонкі гісторыі Беларусі ў гады Вялікай Айчыннай вайны”, створаная сумесна з Нацыянальным архівам Рэспублікі Беларусь, распачынае працу 22 чэрвеня.
Менавіта ў гэты дзень ў 1941 годзе пачалася Вялікая Айчынная вайна, адна з самых сумных старонак нашай гісторыі. Указам Прэзідэнта Рэспублікі Беларусь 22 чэрвеня аб’яўлены Днём усенароднай памяці ахвяр Вялікай Айчыннай вайны і генацыду беларускага народа.
За сваю шматвяковую гісторыю Беларусь неаднаразова станавілася арэнай жорсткіх войнаў. Кожная з іх пакідала пасля сябе смерць і спусташэнне. Самай кровапралітнай стала Вялікая Айчынная. Цаной невымерных страт была дасягнута Перамога. Беларуская зямля прыняла ў сябе мільёны людзей, загінуўшых не толькі на полі бою, але і забітых падчас гітлераўскага акупацыйнага рэжыму. Згодна з апошнімі данымі, у гады Вялікай Айчыннай вайны загінуў кожны трэці беларус.
Экспазіцыя раскрывае сутнасць і змест розных форм генацыду, што прымяняліся фашысцкімі захопнікамі на тэрыторыі Беларусі: нацысцкія лагеры, спаленыя вёскі, халакост, карныя аперацыі акупантаў, выкарыстанне прымусовай працы (беларускія остарбайтары).
Першыя матэрыялы пра злачынствы акупантаў з’явіліся яшчэ падчас вайны. У экспазіцыі прадстаўлены дакументы таго перыяду, гістарычныя даследаванні савецкага часу і сучасныя архіўныя даследаванні з фонду Нацыянальнай бібліятэкі, а таксама – копіі дакументаў з Нацыянальнага архіва Рэспублікі Беларусь. Сярод іх – выданні “Зверства германских фашистов” (Масква, 1941), “Сообщение Чрезвычайной государственной комиссии по установлению и расследованию злодеяний немецко-фашистских захватчиков и их сообщников о злодеяниях немецко-фашистских захватчиков в городе Минск” (Масква, 1944), “Без срока давности. Беларусь”, “Геноцид белорусского народа. Лагеря смерти”, “Холокост в Беларуси: трагедия и память”, копіі дакументаў – актаў аб злачынствах нямецка-фашысцкіх захопнікаў у асобных рэгіёнах Беларусі, зводных табліц і спісаў з пералікам зверстваў, учыненых карнікамі, месцаў масавага пахавання і знішчэння мірных грамадзян і ваеннапалонных на тэрыторыі БССР.
У ліку адметных экспанатаў – выданні з серыі “Беларусь. Трагедия и правда памяти”, якія нагадваюць пра трагічныя месцы на мапе Беларусі – Азарычы, Дальва, Трасцянец, Хатынь, Урочышча Пяскі, Чырвоны Бераг і іншыя.
Выстава будзе карысная ўсім, хто цікавіцца падзеямі Вялікай Айчыннай вайны, нацыянальнай гістарычнай спадчынай Беларусі, каб ведаць, памятаць, задумвацца, што жыццё чалавека – самая галоўная каштоўнасць у свеце.
Кніжная выстава працуе з 22 чэрвеня па 4 кастрычніка 2023 года ў кальцавой галерэі 2-га паверха.
Дата яе заканчэння можа быць зменена.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 29 80.
Матэрыял пададзены аддзелам галерэйна-выставачнай дзейнасці.
