З 7 снежня ў бібліятэцы ў рамках міжнароднага праекта “Францыск Скарына і яго эпоха” арганізавана філатэлістычная выстаўка “Спадчына і гонар Беларусі”, прымеркаваная да 500-годдзя беларускага кнігадрукавання.
Арганізатары – Нацыянальная бібліятэка Беларусі і Рэспубліканскае ўнітарнае прадпрыемства паштовай сувязі “Белпошта”.
Амаль стагоддзе праз паштовыя маркі, мастацкія канверты і паштоўкі жыхары многіх краін свету і самі беларусы знаёмяцца з багацейшай гісторыяй і культурай нашай краіны.
Міністэрства сувязі і інфарматызацыі Рэспублікі Беларусь штогод уводзіць у паштовы зварот значную колькасць разнастайнай прадукцыі, якая становіцца своеасаблівым летапісам айчыннай гісторыі. Адзін з асноўных кірункаў гэтай дзейнасці – прапаганда культурнай спадчыны Беларусі.
Паспяховае супрацоўніцтва з Нацыянальнай бібліятэкай Беларусі спрыяе выпуску прадукцыі, якая займае годнае месца ў філатэлістычных калекцыях. Галоўная кніжная скарбніца краіны сама неаднаразова была прадстаўлена на паштовай прадукцыі.
На выстаўцы дэманструюцца маркі, канверты і паштовыя карткі, прысвечаныя нацыянальнай гістарычнай і культурнай спадчыне, выбітным асобам і падзеям, сучасным рэаліям нашай дзяржавы. Калекцыя сучаснай паштовай прадукцыі прадстаўлена “Белпоштай”, а беларускія маркі, канверты і паштоўкі 1918–1990 гадоў дэманструюцца з асабістай калекцыі намесніка дырэктара Нацыянальнай бібліятэкі Беларусі Алеся Сушы. Сярод іх – адна з першых беларускіх марак з гравюрным партрэтам Францыска Скарыны, а таксама іншыя рэдкія і вядомыя ўзоры паштовай прадукцыі Беларусі.
Убачыць экспазіцыю можна ў выставачнай зале (1-шы паверх, пам. 104) у адпаведнасці з умовамі наведвання міжнароднага выставачнага праекта “Францыск Скарына і яго эпоха”.
Тэлефон для даведак: (8 017) 293 27 22.
 |
 |
 |
|
|
|
|
|
|
|
|
 |
 |
 |
 |
 |
 |
