З 2 мая па 30 чэрвеня ў зале перыядычных выданняў (пам. 106) праходзіць тэматычная выстаўка “Дача маёй мары”.
Сучаснаму гарадскому жыхару, які стаміўся ад мітусні і хуткага жыццёвага рытму, важна для ўзнаўлення сіл умець расслабіцца, пабыць у цішыні, адчуць яднанне з роднай прыродай. Месцам для аматараў такога адпачынку з’яўляецца загарадны домік з участкам зямлі. Чыстае паветра, свежыя прадукты, прагулкі і фізічныя нагрузкі становяцца для гараджан сапраўднымі лекарамі.
Будаўніцтва дома – гэта заўсёды кампраміс паміж жаданнем зрабіць жыллё прыгожым, зручным і адначасова практычным. Публікацыі часопісаў “ДОМЪ”, “Дом и сад”, “Загородный дом”, прадстаўленыя на выстаўцы, пазнаёмяць чытачоў са шматлікімі дызайнерскімі знаходкамі, якія спатрэбяцца пры стварэнні аблічча свайго загараднага дома, раскажуць, як правільна даглядаць дом і прылеглую тэрыторыю.
Візітнай карткай кожнага ўчастка, безумоўна, з’яўляецца ландшафт. Ландшафтны дызайн – гэта цэлае мастацтва, што аб’ядноўвае ў сабе архітэктуру, батаніку і філасофію. Падборка артыкулаў з часопісаў “Наша усадьба”, “Школа цветовода”, “Садовый дизайн” і іншых зацікавіць моднымі стылямі і напрамкамі ландшафтнага дызайну, зарыентуе ў выбары сучасных тэхналогій для правядзення ландшафтных работ.
Афармленне загараднага дома развівае густ, дорыць эстэтычную асалоду. Але ўсё ж галоўнымі складаемымі дачы па-ранейшаму з’яўляюцца сад і агарод. Ужо ў Сярэднія вякі лічылася, што, ствараючы сад, чалавек стварае ўвасабленне нябеснага раю на Зямлі. І у наш час сад – знак сямейнага раю, які дорыць адчуванне спакою, гармоніі, звароту да першакрыніц. Матэрыялы часопісаў “Хозяин”, “Приусадебное хозяйство”, “Цветочный мир” раскажуць пра мастацтва вырошчвання дэкаратыўных кустоў, кветак, дадуць каштоўныя практычныя парады ў гэтай галіне. Акрамя таго, з часопісаў “Огородыч”, “Гаспадыня” наведвальнікі атрымаюць шмат карысных парад пра вырошчванне гародніны і раслін, а таксама догляд за імі.
Экспазіцыя налічвае звыш 40 перыядычных выданняў.
Кантактны тэлефон: (8 017) 293 25 87.