З 3 па 30 верасня ў зале беларускай літаратуры (пам. 205) праходзіць выстаўка “Да сэрцаў людскіх”, прысвечаная 75-годдзю з дня нараджэння беларускага паэта Анатоля Сямёнавіча Грачанікава (1938–1991).
Творчасць лаўрэата прэміі Ленінскага камсамола Беларусі (1974), лаўрэата Дзяржаўнай прэміі Беларусі (1984) А. Грачанікава сведчыць пра самабытны талент паэта, адметную індывідуальнасць і новыя магчымасці мастацкага асваення свету. Яго творам уласцівы шырокі тэматычны дыяпазон, глыбіня думкі, засяроджанасць на значных праблемах сучаснасці, псіхалагічная паўната ў паказе перажыванняў.
Паэт-лірык, ён у сваіх першых вершах пайшоў ад уласнай біяграфіі чалавека, які запомніў гераізм і мужнасць народа ў час вайны, нягоды цяжкай пасляваеннай пары, армейскія будні, вучобу, працу.
На выстаўцы ў раздзеле “Я словы для вершаў сваіх не шукаю...” чытач знойдзе творы паэта: зборнік вершаў “Магістраль” (1964), “Грыбная пара” (1973), выдадзены на рускай мове зборнік паэзіі “Звезды и курганы” (1976), кнігу сатыры і гумару “Школа танцаў” (1988), зборнік “Палессе” (1983), а таксама кнігі вершаў для дзяцей “Валерка і лятаючая талерка” (1983), “Казка пра Івана-ганчара і пачвару цара” (1980) і інш.
Вершы, балады і паэмы А. Грачанікава вылучаюцца высокай моўнай культурай, гарманічным адзінствам зместу і формы. Многія яго творы блізкія да песенных узораў, таму невыпадкова асобныя вершы сталі песнямі: “Дударыкі”, “Белая лілея”, “Над Белай Руссю – белы снег…” і інш.
Экспазіцыя знаёміць з кнігамі і артыкуламі, у якіх пісьменнік выступае як рэдактар і літаратурны крытык.
Асобным раздзелам прадстаўлены пераклады А. Грачанікава твораў іншых аўтараў на беларускую мову. Сярод іх – зборнік паэзіі Зульфіі “Такое сэрца ў мяне” (суаўтар перакладу Э. Агняцвет, 1985), кнігі вершаў для дзяцей сучасных афганскіх паэтаў “Ватан – значыць Радзіма” (1987), вершы М. Пацхішвілі “Рагатун і рагатуха” (1989), а таксама асобныя творы рускіх, украінскіх, паэтаў іншых славянскіх краін і малдаўскіх, літоўскіх, сярэднеазіяцкіх паэтаў.
Кантактны тэлефон: 8 (017) 293 27 16.