З 10 кастрычніка па 10 лістапада ў Нацыянальнай бібліятэцы Беларусі (2-гі паверх, кальцавы калідор) арганізавана кніжна-ілюстрацыйная выстаўка “Беларускі арнамент”, прымеркаваная да Дня работнікаў культуры.
Беларускі арнамент – гэта своеасаблівы код, спосаб перадачы інфармацыі пра светапогляд, вераванні, звычаі і культурныя традыцыі нашага народа. Ён з’яўляецца адметнай праявай нацыянальнай культуры, у ім адлюстроўваецца ўласцівае народу пачуццё гармоніі. Графічным спосабам арнамент перадае назапашаныя продкамі пазнанні пра навакольны свет.
Арнамент у беларускім народным прыкладным мастацтве не толькі павышаў эстэтычную каштоўнасць прадметаў, але і меў важнае абярэгавае значэнне. Пояс, кашуля, фартух, ручнік былі напоўнены асаблівым сімвалічным і магічным сэнсам. Вера нашых продкаў спалучала старажытныя язычніцкія праявы з больш познімі хрысціянскімі. У іх аснове – вера ў шчырую працу, руплівасць сваіх рук, дабро, справядлівасць, любоў.
Падабраныя для выстаўкі энцыклапедычныя, даведачныя, вучэбныя, навуковыя і навукова-папулярныя выданні апавядаюць пра гісторыю развіцця арнаментальнага мастацтва, класіфікацыю, стылі і асаблівасці пабудовы арнаментаў, сэнсавае значэнне арнаментальных сімвалаў. Таксама прапанаваныя выданні даюць уяўленне пра аб’екты прымянення арнаментальнага дэкору: архітэктурныя будынкі і збудаванні, мэблю, кнігі, кераміку, тэкстыль, зброю, адзенне і нават дзяржаўную сімволіку.
Экспазіцыя дапоўнена багатым ілюстрацыйным матэрыялам. Зацікавіць работнікаў культуры, педагогаў, выхавацеляў, а таксама шырокае кола чытачоў, што шануюць свае карані і народнае мастацтва.
Тэлефоны для даведак: (8 017) 293 28 86, 293 29 80.
 |
 |
 |
 |
 |
 |
 |
 |
 |
 |
 |
 |
 |
 |
 |
