З 10 кастрычніка па 11 лістапада ў Нацыянальнай бібліятэцы Беларусі (2-гі паверх, кальцавы калідор) арганізавана кніжна-ілюстрацыйная выстаўка “Пяшчотная, мілая, добрая”, прымеркаваная да Дня маці.
Лёс кожнага чалавека звязаны з імем маці – увасабленнем пяшчоты і цеплыні. Матчына любоў і пяшчота нараджае ў нас імкненне памнажаць сваё пачуццё дабрыні, дарыць яго людзям і змяняць жыццё да лепшага.
У розных краінах свету Дзень маці адзначаюць у розны час. У Беларусі ён супадае з вялікай праваслаўнай урачыстасцю – Пакровам Прасвятой Багародзiцы – і святкуецца 14 кастрычніка.
Дзень маці дапамагае нам яшчэ мацней адчуць веліч і святасць найважнейшага прызначэння жанчыны, звязанага з нараджэннем і выхаваннем дзяцей, усвядоміць яе велізарную ролю ў захаванні і ўмацаванні духоўных каштоўнасцей, маральных ідэалаў. Стваральная роля маці, пазітыўныя жыццёвыя арыенціры дзяцей – гэта тыя асновы, без якіх немагчыма ўмацаванне прэстыжу сям’і, духоўнае адраджэнне грамадства.
У экспазіцыі “Пяшчотная, мілая, добрая” прадстаўлена каля 150 сучасных выданняў, якія тычацца самых важных для кожнай клапатлівай маці тэм: выхавання дзяцей, падтрымлівання здаровага ладу жыцця і правільнага харчавання, захавання сямейных традыцый і звычаяў, планіроўкі, абсталявання і камфортнага ўладкавання жылля.
Экспазіцыя дапоўнена багатым ілюстрацыйным матэрыялам і будзе цікавай для шырокага кола чытачоў, асабліва маладых мам, якія атрымаюць шмат карысных парад і рэкамендацый.
Тэлефон для даведак: (8 017) 293 29 80.
Да Дня маці Нацыянальнай бібліятэкай Беларусі падрыхтавана таксама віртуальная выстаўка "Першае слова ў кожным лёсе".