Напярэдадні Дня работнікаў культуры Нацыянальная бібліятэка Беларусі прапануе кніжную выстаўку “Беларускае мастацтва на старонках сучасных выданняў”, прысвечаную сучасным дасягненням мастацтва Беларусі.
У апошнія гады беларуская мастацтвазнаўчая навука зрабіла важныя крокі ў вывучэнні айчыннага мастацтва, распрацоўцы тэарэтычных асноў яго развіцця. З іх дапамогай складаецца сучаснае, больш дакладнае веданне мінулага, лепш адчуваецца своеасаблівасць і адметнасць айчыннай культуры, агульнасць шляхоў яе развіцця ў еўрапейскім кантэксце.
Сучасная мастацкая культура Беларусі характарызуецца пошукам новых форм праяўлення, пашырэннем альтэрнатыўных метадаў, стракатасцю жанраў. Новым павевам стала арыентацыя творчасці на масавы попыт. Сучаснае мастацтва носіць пераважна відовішчны характар.
Мастацтва Беларусі, яго багатае мінулае, дасягненні сённяшняга дня знайшлі шырокае адлюстраванне на старонках выданняў, якія пабачылі свет у новым стагоддзі ў беларускіх выдавецтвах.
Каля 200 дакументаў, сярод якіх альбомы, энцыклапедычныя выданні, даведнікі, манаграфіі, кнігі ўспамінаў, вучэбныя выданні, апавядаюць пра беларускіх акцёраў, рэжысёраў, спевакоў, музыкантаў, мастакоў. Чытачы атрымаюць магчымасць даведацца пра помнікі архітэктуры, беларускія тэатры, асаблівасці развіцця нацыянальнага музычнага мастацтва, характэрныя рысы жывапісу, дасягненні ў скульптуры, асаблівасці кінематаграфічнай справы.
Выстаўка разлічана на работнікаў сферы культуры, а таксама ўсіх, хто цікавіцца пытаннямі беларускай культуры і мастацтва.
Экспазіцыя размешчана на кальцавым калідоры 2-га паверха і будзе доўжыцца з 8 кастрычніка да 15 лістапада.
Кантактны тэлефон: 293-29-80.
Увага! У чытальных залах арганізаваны доступ да поўных спісаў літаратуры, прадстаўленай на ўсіх кніжных выстаўках, якія ладзяцца ў бібліятэцы.
 |
 |
 |
 |
 |
 |
