12 кастрычніка а 18-й гадзіне ў музеі кнігі Нацыянальнай бібліятэкі Беларусі ладзіцца адкрыццё выставачнага праекта “Авангард – кнізе”.
Праект задуманы як цыкл невялікіх выставак графікі мастакоў-наватараў. Яго асноўная мэта – нагадаць пра час, калі Беларусь для ўсяго свету стала месцам ледзь не самых дзёрзкіх пошукаў у гісторыі мастацтва, і пазнаёміць гледача з графікай пачатку ХХ стагоддзя.
<Першая выстаўка праекта “Іван Клюн, Пётр Львоў і Ніна Хлебнікава” складаецца з 17 акварэляў і малюнкаў, самы ранні з якіх датаваны 1909 годам, а апошні – 1936-м./p>
Галоўная асоба тут – Іван Клюн, культавы мастак рускага авангарду. Беларускі глядач сустрэнецца з яго графікай часоў мадэрну, познімі пейзажамі і нацюрмортамі. Ніна Хлебнікава прадстаўлена профільнымі партрэтамі Маякоўскага і двума супрэматысцкімі творамі, Пётр Львоў – архітэктурнымі накідамі.
Экспазіцыю адкрываюць футурыстычныя кнігі з калекцыі Нацыянальнай бібліятэкі Беларусі.
Рэалізаваць праект дапамагае знаўца авангарду і калекцыянер Леанід Закс, продкі якога выйшлі з беларускага Палесся. Сямейная калекцыя Заксаў знаходзіцца ў Швейцарыі і сёння актыўна рэпрэзентуецца ў мастацкіх і навуковых кругах Еўропы і Расіі.
Выстаўка будзе размешчана ў музеі кнігі па 20 снежня 2010 г.
Тэлефоны для даведак: 293-28-32, 293-27-22.