З 6 лютага па 16 сакавіка ў зале беларускай літаратуры (пам. 205) праходзіць юбілейная выстаўка “Аж голас у веку наступным пачуецца… ”, прысвечаная 80-годдзю з дня нараджэння беларускага пісьменніка і публіцыста Міхася Стральцова.
Прыгожае і разумнае, шматфарбнае і тонкае слова лаўрэата Дзяржаўнай прэміі Беларусі імя Я. Купалы (1988) Міхаіла Лявонцьевіча Стральцова (1937–1987), якое ўвайшло ў беларускую літаруру на пачатку 1960-х, і сёння не можа не выклікаць захаплення і павагі. Пісьменнік па прызванні і псіхолаг па натуры, ён заўсёды піша пра сябе, пра стан сваёй душы і праз сваіх герояў выстаўляе яе перад чытачом. Іншадумец і дысідэнт, яркі прадстаўнік “філалагічнага пакалення” Міхась Стральцоў – постаць адметная, загадкавая і непаўторная.
Выстаўку адкрываюць уласныя творы аўтара, якія складаюць раздзел “Яго шырокі, неабдымны свет” і прадстаўлены як асобнымі выданнямі, так і публікацыямі ў перыёдыцы. Сярод іх – зборнікі апавяданняў “Блакітны вецер” (1962) і “Сена на асфальце” (1966), аповесць “Адзін лапаць, адзін чунь” (1970), зборнік апавяданняў і аповесцей “Перад дарогай” (1994), кніга выбраных твораў “Смаленне вепрука” (2015), “Выбраныя творы” (2015) з серыі “Беларускі кнігазбор” і інш. Са Стральцовым-паэтам знаёмяць зборнікі вершаў “Ядлоўцавы куст” (1973), “Цень ад вясла” (1979), “Яшчэ і заўтра” (1983), “Мой свеце ясны” (1986). Усеагульным прызнаннем карыстаўся Міхась Стральцоў і як таленавіты крытык, аб чым сведчаць кнігі “У полі зроку” (1976), “Пячатка майстра” (1986), эсэ “Загадка Багдановіча” (1969) і інш.
Другая частка экспазіцыі “Жыццё ў слове” прысвечана перакладам М. Стральцова рускіх, украінскіх, італьянскіх, іспанскіх, лацінаамерыканскіх паэтаў, а таксама рамана Ч. Айтматава “Буранны паўстанак” (1987). Тут жа размешчаны пераклады твораў пісьменніка на розныя мовы свету.
Асаблівасці жыццёвага і творчага шляху пісьменніка раскрывае апошні раздзел выстаўкі “Загадка майстра”, які змяшчае шматлікія літаратуразнаўчыя матэрыялы на беларускай, рускай і польскай мовах, а таксама ўспаміны знаёмых і блізкіх юбіляра.
Усяго экспазіцыя налічвае каля 100 дакументаў.
Кантактны тэлефон: (8 017) 293 27 16.
 |
 |
 |
 |
 |
 |
