З 11 кастрычніка па 30 лістапада ў аддзеле абслугоўвання афіцыйнымі дакументамі (пам. 207) адкрыта тэматычная выстаўка “Арганізацыя Аб'яднаных Нацый – надзея і дом для ўсяго чалавецтва”, прысвечаная Дню ААН.
Дзень нараджэння Арганізацыі Аб’яднаных Нацый штогод адзначаецца 24 кастрычніка. Менавіта ў гэты дзень у 1945 годзе ўступіў у сілу яе асноватворны дакумент – Статут. Свята было абвешчана 31 кастрычніка 1947 года на 2-й сесіі Генеральнай Асамблеі ААН (рэзалюцыя № 168), а ў 1971 годзе Асамблея рэкамендавала, каб усе краіны-члены адзначалі яго як дзяржаўнае свята (рэзалюцыя 2782 (XXVI)).
Традыцыйна ў гэты дзень ва ўсім свеце праводзяцца сустрэчы, сходы, дыскусійныя круглыя сталы, выстаўкі, прысвечаныя мэтам арганізацыі і яе дасягненням.
Арганізацыя Аб’яднаных Нацый з’яўляецца ўнікальнай міжнароднай структурай, створанай для падтрымання міру і бяспекі ва ўсім cвеце, развіцця сяброўскіх адносін паміж краінамі і садзейнічання сацыяльнаму прагрэсу. Яна вядзе работу ў інтарэсах усёй чалавечай сям’і колькасцю сем мільярдаў чалавек. Цяпер членамі Арганізацыі Аб’яднаных Нацый з’яўляюцца 193 дзяржавы.
Рэспубліка Беларусь стаяла каля вытокаў стварэння ААН. Наша краіна была ў ліку 51 дзяржавы – заснавальніцы Арганізацыі Аб’яднаных Нацый. Супрацоўніцтва паміж Рэспублікай Беларусь і ААН з’яўляецца адным з прыярытэтных кірункаў знешнепалітычнай дзейнасці нашай краіны. Беларуская дэлегацыя пастаянна ўдзельнічае ў рэгулярных і спецыяльных сесіях Генеральнай Асамблеі, Эканамічнага і сацыяльнага савета і іншых вядучых органаў ААН. Наша дзяржава заўсёды імкнулася займаць у рамках ААН актыўную пазіцыю па крытычна важных пытаннях і праблемах міжнароднага парадку дня і ўносіць рэальны ўклад у рашэнне гэтых праблем.
Дзейнасць арганізацыі шматгранная і ахоплівае шырокі круг важных праблем – ад устойлівага развіцця і памяншэння маштабаў галечы да барацьбы з тэрарызмам і незаконным абарачэннем наркотыкаў, ад падтрымання дэмакратыі і развіцця сістэмы кіравання да аховы навакольнага асяроддзя і рашэння глабальных медыцынскіх праблем. Агульнавядомыя поспехі ААН у такіх галінах дзейнасці, як падтрыманне міру, абарона праў чалавека і гуманітарная дапамога.
Аднак існуе і шэраг нявырашаных праблем. Эканамічная і фінансавая нестабільнасць, лакальныя ўзброеныя канфлікты, недахоп энергетычных, харчовых і прыродных рэсурсаў, пагрозы экалагічнага характару – усё гэта патрабуе новага прачытання і разумення, а таксама задзейнічання новых механізмаў, накіраваных на рашэнне праблем.
Шматгранная дзейнасць ААН па збавенні будучых пакаленняў ад бедстваў вайны, падтрыманні міру і міжнароднай бяспекі, развіцці дружалюбных адносін паміж нацыямі на аснове павагі прынцыпу раўнапраўя і самавызначэння народаў, ажыццяўленні міжнароднага супрацоўніцтва ў вырашэнні міжнародных праблем эканамічнага, сацыяльнага, культурнага і гуманітарнага характару раскрываецца ў дакументах, што экспануюцца на выстаўцы. У асобным раздзеле прадстаўлена літаратура, якая асвятляе розныя аспекты супрацоўніцтва Рэспублікі Беларусь і Арганізацыі Аб’яднаных Нацый.
На выстаўцы прадстаўлена звыш 100 дакументаў з фондаў бібліятэкі на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Экспазіцыя складаецца з наступных тэматычных раздзелаў:
- Асноўныя звесткі пра ААН.
- Падтрыманне міжнароднага міру і бяспекі.
- Садзейнічанне ўстойліваму развіццю.
- Падтрыманне і абарона праў чалавека.
- Міжнароднае права.
- Аказанне гуманітарнай дапамогі.
- ААН і Рэспубліка Беларусь.
Выстаўка будзе цікавай спецыялістам у галіне міжнароднага права і міжнародных адносін, палітолагам, студэнтам і выкладчыкам, а таксама ўсім, хто цікавіцца дзейнасцю ААН.
Карысныя спасылкіАсноўныя звесткі
- Дзень Арганізацыі Аб’яднаных Нацый
- 70-я гадавіна Арганізацыі Аб’яднаных Нацый
- Генеральны сакратар
- Галоўныя органы ААН
- Дзяржавы – члены ААН
- Гісторыя ААН
- Агульныя звесткі
- Сістэма ААН
- Статут ААН
Партнёрскія сувязі
- Глабальны дагавор
- Грамадзянскае супольніцтва
- Дзелавыя колы
- ААН і верхавенства права
- ААН працуе для вас
- Партнёрства
Публікацыі
- Усё самае цікавае пра Арганізацыю Аб’яднаных Нацый
- З дня ў дзень
- Коратка пра ААН
- Гэта – Арганізацыя Аб’яднаных Нацый
- Дадатковыя публікацыі ААН