З 15 па 30 красавіка ў зале беларускай літаратуры (пам. 205) праходзіць кніжная выстаўка “Адзін з першапраходцаў”, прысвечаная 130-годдзю з дня нараджэння беларускага вучонага-гісторыка Усевалада Макаравіча Ігнатоўскага (1881–1931).
Імя У.М. Ігнатоўскага – вучонага, педагога і асветніка, актыўнага правадніка палітыкі беларусізацыі, першага наркама асветы і прэзідэнта акадэміі навук, грамадскага і палітычнага дзеяча – было шырока вядома ў БССР у 20-я гг. З імем вучонага звязана стварэнне вышэйшай школы і навучальных устаноў у савецкай Беларусі. Шмат сілы і энергіі патраціў Ігнатоўскі на арганізацыю і развіццё Беларускага дзяржаўнага ўніверсітэта. Пры яго непасрэдным удзеле ў 1922 г. быў адкрыты Інстытут беларускай культуры (Інбелкульт), рэарганізаваны ў 1928 г. у Беларускую акадэмію навук, Ігнатоўскі стаў яе першым прэзідэнтам.
На выстаўцы экспануецца каля 70 дакументаў, якія знаёмяць з творчай спадчынай вучонага, яго жыццём і дзейнасцю.
Буйны ўклад унёс У.М. Ігнатоўскі ў станаўленне гістарычнай навукі ў БССР. Ім напісаны шэраг навуковых прац па гісторыі Беларусі, сярод якіх “Кароткі нарыс гісторыі Беларусі” (1919), “Гісторыя Беларусі ў ХІХ і ў пачатку ХХ ст.” (1926) і іншыя.
Адметнае месца ў экспазіцыі займае работа “1863 год на Беларусі” (1930) – першае ў беларускай гістарыяграфіі грунтоўнае навуковае даследаванне паўстання 1863–1864 гг., пабудаванае на дакументальных крыніцах.
Раздзел "Жыццё цудоўнае і трагічнае" знаёміць з публікацыямі, змешчанымі ў энцыклапедычных выданнях, кнігамі і артыкуламі пра жыццё і творчасць У.М. Ігнатоўскага.
Кантактны тэлефон: 293-27-16.