Я, як мастак, разумею Час – гэта рытм майго сэрца
ад нараджэння ў хроніцы быцця на маленечкай блакітны планеце,
дзе пары супрацьлегласцей проціборствуюць, імкнучыся да гармоніі,
дзе чалавек і Сусвет адзіныя ў імгненнях майго зямнога жыцця…
І “Мера – гэта Аблічча Свету”, і “Усяму свой час
усякай рэчы пад небам...”
Уладзімір Хін
Нацыянальную бібліятэку Беларусі на працягу шэрагу гадоў звязваюць творчыя і сяброўскія адносіны з вядомым беларускім мастаком Уладзімірам Правідохіным. За апошнія тры гады аўтар перадаў у электронную бібліятэку бібліятэкі звыш 230 графічных работ, не выключэннем стаў і 2024 год.
Уладзімір Андрэевіч Правідохін (Уладзімір Хін) – вядомы беларускі мастак, член Саюза мастакоў СССР, член Беларускага саюза мастакоў. Яго працы захоўваюцца ў Нацыянальным мастацкім музеі Рэспублікі Беларусь, Нацыянальнай бібліятэцы Беларусі, Музеі Марка Шагала ў Віцебску, Полацкім гісторыка-культурным музеі-запаведніку, а таксама ў музеях Расіі, ЗША, Германіі і прыватных калекцыях Францыі, Ізраіля, Швейцарыі і інш.
Электронная калекцыя “Час Мера Свету” серыі “Майстры беларускай культуры. Уладзімір Правідохін” папоўнілася 37 выяўленчымі дакументамі.
Сярод новых работ – творы, выкананыя ў тэхніках акварэлі, тэмперы і малюнка. Кожны матэрыял мае сваю спецыфіку і мастацкі вобраз будуецца, зыходзячы з магчымасцей такіх тэхнік, як малюнак, акварэльны і тэмперны жывапіс.
Каляровы і графічны рытм кампазіцый перадае стан здзіўлення аўтара, які нібы ўпершыню ўбачыў прыгажосць пабудовы сусвету, і кажа пра манізм сусветных рытмаў, дзе цела, дух, слова, колер, лінія і кропка адзіныя. Акварэльныя фарбы празрыстыя, тэмперныя колеры чыстыя, а лініі тушы дынамічныя і вытанчаныя.
Манументальная строгасць кампазіцый у натуральным адзінстве супрацьлегласцей і стварае гармонію прапанаваных твораў Уладзіміра Хіна.
Цікавасць заслугоўваюць працы “Фата Маргана” (2005 і 2006 гг.), якія адлюстроўваюць ўспрыманне аўтара аптычнай з’явы ў атмасферы свету віражоў.
|
|
Фата Маргана. 2005 | Фата Маргана. 2006 |
Нацыянальная бібліятэка Беларусі дзякуе Уладзіміру Андрэевічу Правідохіну за каштоўны падарунак для чытачоў бібліятэкі. Дзякуючы такім неабыякавым людзям культурная спадчына Беларусі цяпер даступная ўсім.
Матэрыял пададзены аддзелам фарміравання электроннай бібліятэкі.