Рытм сучаснага жыцця і зменлівыя ўмовы патрабуюць ад усіх удзельнікаў эканамічнай дзейнасці трымаць руку на пульсе сучасных тэндэнцый развіцця вытворчасці і бізнесу. З 1 ліпеня віртуальная чытальная зала НББ сумесна з публічнымі бібліятэкамі нашай краіны адкрывае для чытачоў тэставы доступ да вядомага інфармацыйнага рэсурсу па эканоміцы – электроннай бібліятэцы “Grebennikon”.
Бібліятэка змяшчае лічбавыя версіі спецыялізаваных часопісаў і кніг выдавецкага дома “Гребенников” па менеджменце, маркетынгу, кіраванні фінансамі і персаналам.
Сумеснае выкарыстанне электроннага рэсурсу стала падставай для чарговай прафесійнай сустрэчы з нашымі калегамі – бібліятэкарамі з розных рэгіёнаў Беларусі. У дзень адкрыцця тэсціравання супрацоўнікі аддзела карпаратыўнага ўзаемадзеяння падрыхтавалі і правялі анлайн-трэнінг па працы з электроннай бібліятэкай. Яе шырокі кантэнт, магчымасці пошуку інфармацыі і адміністрыравання ўдзельнікам трэнінгу прадставіла спецыяліст аддзела карпаратыўнага ўзаемадзеяння Соф’я Сямёнава.
Для карыстальнікаў публічных бібліятэк, якія ўдзельнічаюць у тэсціраванні, рэсурс будзе даступны да 1 жніўня 2021 года. Спадзяёмся, што гэта стане ўкладам публічных бібліятэк у эканамічнае развіццё рэгіёнаў нашай краіны.
Нагадваем, што пастаянны доступ да электроннай бібліятэкі “Grebennikon” адкрыты для ўсіх чытачоў Нацыянальнай бібліятэкі Беларусі.
Віртуальная чытальная зала запрашае бібліятэкі і ўсе зацікаўленыя арганізацыі да партнёрства па карпаратыўнай падпісцы на ліцэнзійныя базы даных!
Матэрыял пададзены аддзелам карпаратыўнага ўзаемадзеяння.
