Дата правядзення
Час правядзення
Месца правядзення
24 студзеня адбылося ўрачыстае адкрыццё фотавыстаўкі “Нябачныя героі”.
Экспазіцыя арганізавана сумесна з грамадскай дабрачыннай арганізацыяй “Беларускі дзіцячы хоспіс”. Мэта – прыцягнуць увагу да праблемы дзіцячых хвароб і дзейнасці хоспіса, падтрымаць пацыентаў і іх сем’і, пазнаёміць шырокую грамадскасць з праблемамі такіх сем’яў праз моцныя і глыбокія фотавобразы.
“Нябачныя героі” паказваюць жыццё як цуд, дзе кожны ўдзельнік – магутны добры чараўнік. Выстаўка здзейснена дзякуючы таленту фатографаў Ксеніі Ляговіч (валанцёра, студэнткі) і Ульяны Казакевіч (супрацоўніка хоспіса), якія на дабрачынных пачатках арганізавалі фотаздымку.
У экспазіцыі – партрэты падапечных хоспіса, якія паўстаюць у вобразах беларускіх міфічных персанажаў, героеў беларускіх казак. 45 фотаздымкаў-акенцаў у свет мрояў і надзеі, свет моцнай падтрымкі, сілы і мудрасці народнай традыцыйнай культуры. Кожная магутная сутнасць старажытнага беларускага фальклору валодала не толькі магічнымі здольнасцямі, але і няпростым характарам. І знешнія рысы, і характар міфічных істот перададзены героямі ярка, выразна, красамоўна і жывапісна. 9 рэальных герояў становяцца 9 міфічнымі сутнасцямі, прадстаўленымі ў фотасерыях.
Наведванне выставы ўваходзіць у кошт наведвання агляднай пляцоўкі.
Час яе работы адпавядае рэжыму работы агляднай пляцоўкі.
Наведаць экспазіцыю можна да 5 сакавіка 2024 г.
Дата заканчэння яе працы можа быць зменена.
Тэлефон для даведак: (8 017) 368 37 37.
Матэрыял падрыхтаваны аддзелам сувязей з грамадкасцю.