Дата правядзення
Час правядзення
Месца правядзення
Юбілейная кніжная выстаўка “Таленавіты даследчык і педагог”, прысвечаная 100-годдзю з дня нараджэння беларускага мовазнаўца, доктара філалагічных навук, прафесара, заслужанага дзеяча навукі Беларусі Віктара Уладзіміравіча Мартынава (1924–2013), праходзіць з 4 студзеня па 31 студзеня ў зале беларускай літаратуры (пам. 205).
Уласцівыя даследчыку дух наватарства, шырокая, сапраўды энцыклапедычная эрудыцыя, уменне працаваць “на стыку навук”, прывялі да стварэння ім Універсальнага семантычнага кода (УСК), які выклікае зацікаўленасць спецыялістаў у галіне аўтаматызаванага кіравання і інфарматыкі.
Віктар Уладзіміравіч напісаў і апублікаваў каля 20 кніг і брашур, а таксама больш за 250 навуковых артыкулаў. Яго працы вядомы не толькі ў Беларусі, але і далёка за яе межамі, і атрымалі высокую адзнаку спецыялістаў.
Выдатны спецыяліст і таленавіты педагог В.У. Мартынаў зрабіў важкі ўклад у падрыхтоўку маладых навукоўцаў. Пад яго кіраўніцтвам было абаронена 17 кандыдацкіх і 4 доктарскія дысертацыі па розных лінгвістычных напрамках.
Экспазіцыя знаёміць з асноўнымі кнігамі вучонага: “Славяно-германское лексическое взаимодействие древнейшей поры (к проблеме прародины славян)”, “Кибернетика, семиотика, лингвистика”, “Прарадзіма славян: лінгвістычная верыфікацыя”, “Этнагенез славян: мова і міф”, “В центре сознания человека” і інш., серыяй выданняў, прысвечаных Універсальнаму семантычнаму коду (1977, 1982, 1984 і інш.), з калектыўнымі манаграфіямі з яго ўдзелам: “Марфемная дыстрыбуцыя ў беларускай мове. Дзеяслоў”, “Лексіка Палесся ў прасторы і часе”, “Этымалагічны слоўнік беларускай мовы” (1–13 вып.), шматлікімі навуковымі артыкуламі, шэрагам дакладаў на з’ездах славіністаў.
Дапаўняюць выстаўку публікацыі, змешчаныя ў энцыклапедычных выданнях, навуковых артыкулах пра жыццё і працу юбіляра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.