Народнае мастацтва беларусаў – у выставачным праекце “Жывыя крыніцы” (+відэа)

17 лютага ў выставачным комплексе бібліятэкі (пам. 104) у межах Года гістарычнай памяці адбылося адкрыццё экспазіцыі “Жывыя крыніцы”.

Нацыянальная бібліятэка Беларусі сумесна з Беларускім саюзам майстроў народнай творчасці падрыхтавала выставу вырабаў, якія прама ці апасродкавана працягваюць і развіваюць шматвяковыя традыцыі беларускага народнага мастацтва.

Са старадаўніх часоў да сённяшніх дзён беларусамі былі захаваны многія віды і формы традыцыйнай мастацкай творчасці: разьба па дрэве, ганчарства, кавальства, ткацтва, вышыўка, роспіс, пляценне з прыродных матэрыялаў. З усіх рэгіёнаў Беларусі ў сталіцу прывезлі працы звыш ста майстроў народнай творчасці.

У выставачным праекце прадстаўлены:

• калекцыя посуду з лазы аматарскага аб’яднання “Вербачка”;
• выцінанкі Людмілы Валковіч-Борыс і Лізаветы Чырвонцавай;
• вышыўка і ткацкія вырабы Марыны Гушчы і Ірыны Забаўскай;
• ганчарны посуд Васіля Логвіна і Мікалая Стрэльчанкі;
• саломапляценне Алёны Грынь і Алы Аўсяннікавай;
• дэкаратыўныя пано ў тэхніцы мастацкіх роспісаў Ірыны Церашковай і Святланы Скавырка;
• велікодныя пісанкі Вольгі Хачковай;
• дробная гліняная пластыка Васіля Якавенкі;
• вырабы з бісеру Веры Пярмінавай і Алены Артынскай;
• міфалагічныя і фальклорныя лялькі аб’яднання “Папараць-кветка”;
• шмат іншых узораў мастацкіх рамёстваў, якія дэманструюць напрамкі развіцця народнага мастацтва Беларусі.

Экспанаты – адлюстраванне сапраўднага шляху жыцця беларусаў. За кожным прадметам, за кожным вырабам – ці жыццёвая сітуацыя, ці шчаслівая сустрэча, ці роздум у адзіноцтве. Спадзяёмся, і ў наведвальнікаў яны закрануць запаветныя струны душы, адгукнуцца радасцю, разварушаць пачуцці і ўспаміны з дзяцінства.

На працягу дзеяння выстаўкі пройдуць прэзентацыі і майстар-класы па стварэнні цацак з саломкі, паштовак з выцінанкай і цікавыя сустрэчы.

Запрашаем наведаць экспазіцыю да 23 ліпеня 2022 г.
Дата заканчэння яе працы можа быць зменена.

Час работы выстаўкі адпавядае рэжыму работы бібліятэкі.
Кошт квіткоў складае:

• для дарослых – 6 рублёў;
• для навучэнцаў сярэдніх, сярэднеспецыяльных і вышэйшых устаноў – 3 рублі;
• сямейны квіток (2 дарослых з дзіцём да 16 гадоў) – 11 рублёў;
• сямейны квіток (2 дарослых з 2 дзецьмі да 16 гадоў) – 13 рублёў;
• шматдзетныя сем’і (пры прад'яўленні дакумента) – 13 рублёў.

• дзеці да 7 гадоў і выхаванцы дзіцячых дамоў, людзі з абмежаванымі магчымасцямі (пры прад’яўленні дакумента);
• суправаджаючыя груп школьнікаў, выхаванцаў устаноў адукацыі (1 чалавек на 10 дзяцей).

Тэлефоны для даведак: (8 017) 368 37 37, 293 27 50.

Глядзіце таксама рэпартаж тэлеканала "Беларусь 1" пра этнапраект і відэа пра майстар-класы, якія арганізуюцца ў яго межах.