21 красавіка ў Нацыянальнай бібліятэцы пройдуць мерапрыемствы, прысвечаныя Сусветнаму дню кнігі і аўтарскага права, а таксама Міжнароднаму дню інтэлектуальнай уласнасці.
У 10.00 адбудзецца адукацыйны семінар “Прававыя аспекты дзейнасці бібліятэкі ў лічбавым асяроддзі”.
У ім прымуць удзел кіраўнікі і спецыялісты Нацыянальнай бібліятэкі Беларусі, Нацыянальнага цэнтра інтэлектуальнай уласнасці, Нацыянальнага цэнтра заканадаўства і прававых даследаванняў Рэспублікі Беларусь, юрыдычнага факультэта Беларускага дзяржаўнага ўніверсітэта, таксама супрацоўнікі навуковых адукацыйных і інфармацыйных устаноў краіны.
У 16.00 у галерэі “Лабірынт” (3-ці паверх) пройдзе культурна-асветніцкая акцыя “Майстры беларускай культуры. Эдуард Зарыцкі”, прысвечаная творчасці кампазітара.
Ганаровы госць мерапрыемства – дачка Эдуарда Барысавіча Ліна Літц, якая перадала правы на выкарыстанне алічбаваных нотных рукапісаў кампазітара ў інфармацыйныя рэсурсы Нацыянальнай бібліятэкі.
У рамках акцыі запланавана выступленне Таццяны Пановай – мастацкага кіраўніка творчай майстэрні эстраднага мастацтва “Хвілінка”; Уладзіміра Лоя – дырэктара міжнароднага грамадскага маладзёжнага харавога аб’яднання “Камертон”, кіраўніка хору “Пунсовыя ветразі”; Таццяны Якушавай – загадчыцы аддзела музычных праграм Першага нацыянальнага канала Беларускага радыё; Людмілы Палкоўнікавай – выкладчыцы Беларускага дзяржаўнага ўніверсітэта культуры і мастацтваў, музычнага тэлежурналіста, радыё- і тэлерэдактара; Уладзіміра Правалінскага – заслужанага дзеяча культуры Беларусі, эстраднага спевака, заслужанага артыста Беларусі.
На мерапрыемствы прагучаць музычныя творы Эдуарда Зарыцкага ў выкананні педагога па вакале творчай майстэрні эстраднага мастацтва “Хвілінка” Кацярыны Шумскай і навучэнцаў дзіцячай музычнай школы мастацтваў.
Для наведвальнікаў будзе арганізавана кніжная выстава, якая дазволіць бліжэй пазнаёміцца з жыццём і творчасцю знакамітага беларускага кампазітара.
Матэрыял пададзены цэнтрам алічбоўкі і забеспячэння захаванасці бібліятэчных дакументаў.
Фота Паўла Марцінчыка, "Комсомольская правда" kp.by