Бясконцая прастора мастацтва

C 18 студзеня па 11 лютага ў зале дакументаў па мастацтве (пам. 306) праходзіць кніжна-ілюстрацыйная выстаўка “Бясконцая прастора мастацтва”, прысвечаная 80-годдзю заснавання Нацыянальнага мастацкага музея Беларусі.

Нацыянальны мастацкі музей – найбуйнейшая экспазіцыйна-выставачная і культурна-асветніцкая пляцоўка краіны, якая славіцца значнымі калекцыямі айчыннага і замежнага выяўленчага мастацтва.

Шлях развіцця і станаўлення музея быў няпростым: адкрыўшыся ў 1939 годзе як Дзяржаўная карцінная галерэя і сфармаваўшы дзякуючы намаганням супрацоўнікаў значную мастацкую калекцыю, установа цалкам страціла збор ў першыя дні Вялікай Айчыннай вайны. Перажыўшы ваеннае ліхалецце, перыяд аднаўлення і фарміравання новага музейнага фонду і гады будаўніцтва, музей паўстаў у новым абліччы – у выглядзе велічнага будынка з калонамі па праекце архітэктара Міхаіла Бакланава. Дзякуючы плённай працы, любові да мастацтва, несумненнаму прафесіяналізму дырэктара музея Алены Васільеўны Аладавай установа дасягнула найвышэйшага ўзроўню развіцця і стала гонарам краіны, яе культурнай і гістарычнай каштоўнасцю.

Сёння музей – сапраўдная скарбніца шэдэўраў, у якой развіваецца рэстаўрацыйная база, ажыццяўляецца навукова-даследчая і выдавецкая дзейнасць, рэалізуюцца міжнародныя выставачныя праекты, захоўваецца і прапагандуецца нацыянальнае мастацтва, падтрымліваюцца маладыя творцы і сучасныя арт-практыкі. Гэта не толькі сховішча мастацтва, нацыянальны набытак і памяць краіны, але і бясконцая творчая прастора з разнастайнымі мерапрыемствамі, што аб'ядноўваюць усе віды мастацтва.

На выстаўцы прадстаўлены матэрыялы пра гісторыю Нацыянальнага мастацкага музея, яго дзейнасць, супрацоўнікаў і дырэктараў, якія ўнеслі значны ўклад у развіццё беларускага мастацтва і культуры. У іх ліку – Мікалай Міхалап, Алена Аладава, Юрый Карачун і Уладзімір Пракапцоў.

Цікавасць выклічуць альбомы рэпрадукцый са збору Нацыянальнага мастацкага музея, каталогі найбольш значных выставачных праектаў, зборнікі дакладаў навуковай канферэнцыі “Аладаўскія чытанні”, выяўленчыя матэрыялы, якія прадстаўляюць фонды беларускага, рускага і заходнееўрапейскага мастацтва, серыя навукова-папулярных кніг “Славутыя мастакі з Беларусі”, якая штогод выпускаецца музеем.