З 25 студзеня да ўвагі карыстальнікаў прадстаўлена пастаянная віртуальная выстаўка “Электронныя выданні з фондаў Нацыянальнай бібліятэкі Беларусі”.
У экспазіцыі прадстаўлены аўдыякнігі, электронныя энцыклапедыі, мастацкія фільмы, спектаклі і іншыя электронныя выданні з фондаў Нацыянальнай бібліятэкі Беларусі. Гэта каля 80 дыскаў, сістэматызаваных у восем тэматычных раздзелаў. Сярод іх – выданні па выяўленчым мастацтве, архітэктуры, віртуальныя падарожжы па музеях свету, даведнікі па Беларусі і іншая цікавая інфармацыя. Асобае месца займае раздзел, прысвечаны электронным выданням, створаным спецыялістамі Нацыянальнай бібліятэкі Беларусі.
Выстаўка мае простую навігацыю з гіперспасылкамі, якія перамяшчаюць карыстальніка ў раздзел, што яго цікавіць (кнопкі “Раздзелы”, “Далей”, “Назад”). Для пачатку прагляду выкарыстайце кнопку F5. Для атрымання больш падрабязнай інфармацыі пра канкрэтнае выданне клікніце на яго фота.
Віртуальная выстаўка "Электронныя выданні з фондаў Нацыянальнай бібліятэкі Беларусі" падрыхтавана супрацоўнікамі сектара абслугоўвання дакументамі па выяўленчым і відовішчных мастацтвах аддзела абслугоўвання спецыялізаванымі фондамі.
Пры наведванні бібліятэкі патрэбнае выданне можна заказаць і прагледзець у зале нотных і аўдыявізуальных дакументаў (3-ці паверх, памяшканне 305). Кансультацыю па пошуку і заказе электронных дакументаў можна атрымаць у супрацоўнікаў залы.
Тэлефон для даведак: (8 017) 293 27 53.