75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”.
З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Фатаграфіі лётчыкаў-знішчальнікаў. Спектакль у тэатры імя Янкі Купалы. Ганчарская хата-чытальня. Газеты: “Звязда” (№ 26); “Советская Белоруссия” (№ 26).
У газетах гэтага дня – матэрыялы пра баі пад Брэслау, фарсіраванне нашымі войскамі ракі Одэр, бітву частак 3-га Беларускага фронту з нямецкім гарнізонам на Земландскім (Калінінградскім) паўвостраве (“Звязда”, № 26; “Советская Белоруссия”, № 26). “Звязда” размясціла фатаграфіі паветраных асаў, якія служаць на 1-м Украінскім фронце. На першым фота – Герой Савецкага Саюза гвардыі маёр М.К. Шут, цяпер ён лётчык-знішчальнік, а да вайны працаваў у Мінску на кандытарскай фабрыцы “Камунарка”. На 3-й старонцы газеты – фатаграфія лётчыкаў-знішчальнікаў, ураджэнцаў розных куткоў СССР: Марыйскай АССР, Віцебска, Краснадара, Масквы.
Цікава тое, што напярэдадні, 8 лютага, другі лётчык – М.П. Дзевятаеў збег з палону на нямецкім самалёце (“1418 дзён Вялікай Айчыннай вайны”, Мінск, 2014, с. 377).
Некалькі матэрыялаў прысвечаны Памеснаму сабору Рускай праваслаўнай царквы, які праходзіў з 31 студзеня па 4 лютага. У Мінску гледачам прапануюць паглядзець фільмы “Малахаў курган” (кінатэатр “Першы”), “Беспасажніца” (кінатэатр “Беларусь”), “Новыя прыгоды Швейка” (кінатэатр “Радзіма”) (“Звязда”, № 26; “Советская Белоруссия”, № 26).
У рубрыцы “Тэатр” (“Звязда”, № 26) – рэцэнзія на спектакль па п’есе А.М. Астроўскага “Позняе каханне”, пастаўлены ў Беларускім дзяржаўным тэатры імя Янкі Купалы рэжысёрам М. Літвінавым. У Лідскім раёне хата-чытальня Ганчарскага сельсавета прызнана лепшай. Яе гаспадыня клапоціцца аб утульнасці і чысціні ў памяшканні, своечасова атрымлівае свежыя нумары газет. Удзельнікі харавога і драматычнага гурткоў, арганізаваных пры хаце-чытальні, ужо не раз і з поспехам выступалі перад аднавяскоўцамі.
Да Перамогі заставалася 90 дзён...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння НББ.
Усе матэрыялы праекта даступны на партале НББ і сайце “Беларусь у інфармацыйнай прасторы”.
