Клаўдзія Уладзіміраўна нарадзілася 14 ліпеня 1946 года ў вёсцы Грабёнка Чэрвеньскага раёна Мінскай вобласці. Скончыўшы ў 1961 годзе восем класаў, яна паступіла ў Магілёўскі бібліятэчны тэхнікум імя А.С. Пушкіна.
Атрымаўшы сярэднюю спецыяльную адукацыю, дзяўчына не спынілася на дасягнутым і падоўжыла навучанне ў Мінскім дзяржаўным педагагічным інстытуце імя М. Горкага (сёння – Беларускі дзяржаўны педагагічны ўніверсітэт імя М. Танка) па спецыяльнасці “бібліятэказнаўства і бібліяграфія”. У чэрвені 1968-га яна скончыла вучобу і другую палову года адпрацавала ў Гомельскай абласной бібліятэцы імя У.І. Леніна.
У пачатку 1969 года К.У. Прэнц была прынята на часовую пасаду бібліятэкара ў Дзяржаўную бібліятэку БССР імя У.І. Леніна (сёння – Нацыянальная бібліятэка Беларусі), якой, у выніку, аддала амаль паўстагоддзя свайго прафесійнага жыцця.
Першыя два з паловай гады Клаўдзія Уладзіміраўна працавала ў патэнтным аддзеле, а потым была пераведзена на пасаду бібліёграфа аддзела мастацтва. У 1975 годзе пры гэтым аддзеле была арганізавана інфармацыйная група па праблемах культуры і мастацтва ў складзе трох чалавек. К.У. Прэнц была прызначаная старшым рэдактарам гэтай групы.
Загадам Міністэрства культуры БССР ад 27 жніўня 1976 года група была пераўтворана ў аддзел навуковай інфармацыі па праблемах культуры і мастацтва, функцыі якога ўключалі забеспячэнне апарату Міністэрства культуры БССР, вучоных і спецыялістаў рэспубліканскіх устаноў і вышэйшых навучальных устаноў культуры і мастацтва галіновай інфармацыяй. Клаўдзія Уладзіміраўна працавала галоўным бібліятэкарам аддзела, а з кастрычніка 1979 года ўзначаліла ў ім сектар навуковай апрацоўкі нацыянальных матэрыялаў.
К.У. Прэнц была вельмі працавітым, руплівым і кампетэнтным супрацоўнікам.
З’яўляючыся спецыялістам высокай кваліфікацыі ў галіне бібліяграфічнай работы, яна займалася інфармацыйнай дзейнасцю па абслугоўванні спецыялістаў сферы музеязнаўства, аховы помнікаў гісторыі і культуры, выяўленчага мастацтва: рыхтавала аналітычныя матэрыялы для навукова-інфармацыйных зборнікаў “Аператыўная інфармацыя па праблемах культуры і мастацтва”, “Актуальныя праблемы культуры і мастацтва” (звыш 120 публікацый), выконвала аналітычныя і бібліяграфічныя даведкі для спецыялістаў сферы культуры, супрацоўнікаў апарату Міністэрства культуры і інш.
Паспяхова працавала Клаўдзія Уладзіміраўна над складаннем рэкамендацыйнага паказальніка “Літаратура і мастацтва БССР”, бібліяграфічнага агляду “Беларускае кіно сёння” (у якасці дадатку да выдання “Новыя кнігі БССР”), займалася арганізацыяй і рэарганізацыяй сістэматычнага каталога нот.
Добрае веданне замежных моў дазваляла ёй на падставе часопісных публікацый замежных і савецкіх выданняў складаць картатэку “Сучасная мастацка-матэрыяльная культура”.
Аператыўна і якасна К.У. Прэнц рыхтавала да друку штомесячны бібліяграфічны паказальнік “Новая літаратура па культуры і мастацтву БССР”, бібліяграфічную інфармацыю пра беларускія крыніцы для выданняў Усесаюзнага інфармацыйнага цэнтра.
Пераезд у новы будынак адкрыў для Нацыянальнай бібліятэкі Беларусі новыя кірункі работы. Новы імпульс атрымала дзейнасць па стварэнні выдавецкіх і віртуальных праектаў, накіраваных на папулярызацыю нацыянальнай гісторыка-культурнай спадчыны. Клаўдзія Уладзіміраўна прымала актыўны ўдзел і ў гэтай працы. Пабачылі свет такія праекты, як “Паэт красы і гармоніі: да 120-годдзя з дня нараджэння М. Багдановіча”, “Не пакідайце ж мовы нашай беларускай…: да 170-годдзя з дня нараджэння Ф. Багушэвіча”, “Жыве паміж намі дудар наш…: да 200-годдзя з дня нараджэння В. Дуніна-Марцінкевіча”, “Верай і праўдай прайшоў праз эпоху: да 120-годдзя з дня нараджэння К. Крапівы” і інш.
Працоўная біяграфія К.У. Прэнц цесна звязана з грамадскім жыццём бібліятэкі і краіны ў цэлым: яна была прафоргам свайго аддзела, членам групы народнага кантролю, старшынёй таварыства па ахове помнікаў гісторыі і культуры.
За гады працы Клаўдзія Уладзіміраўна атрымала шэраг падзяк і ўзнагарод, сярод якіх Ганаровы нагрудны знак Міністэрства культуры Рэспублікі Беларусь (2001). У 2015 годзе была ўганаравана званнем “Лепшы па прафесіі” ў намінацыі “За ўклад у развіццё бібліятэчнай справы”.
К.У. Прэнц пайшла на заслужаны адпачынак 11 лістапада 2016 года. На жаль, неўзабаве пасля гэтага, у 2017 годзе, яе не стала.
Клаўдзія Уладзіміраўна назаўсёды застанецца ў памяці калег як высокапрафесійны спецыяліст, а таксама надзейны сябар і прыгожая жанчына.
У публікацыі выкарыстаны фотаздымкі з уласнага архіва Святланы Базылевай-Ланько.
Матэрыял падрыхтаваны навукова-даследчым аддзелам бібліятэказнаўства.
Аб ветэранах і супрацоўніках Нацыянальнай бібліятэкі Беларусі чытайце ў рубрыцы навін “Партрэты: гісторыя бібліятэкі ў асобах”.