Сёлета спаўняецца 190 гадоў з часу заснавання Магілёўскай губернскай друкарні. Яна праіснавала 84 гады (1833–1917) пры Магілёўскім губернскім праўленні. У 1846 г. губернскай друкарні было перададзена абсталяванне кансісторскай друкарні, якая спыніла сваё існаванне ў 1844 г.
Нягледзячы на заснаванне друкарні ў 1833-м, першая кніга “Могилёвская флора” Р. Пабо і К. Чалоўскага выйшла ў 1853–1855 гг., а сістэматычнае кнігадрукаванне пачалося толькі з 1861 г. Фактычна трэцяя частка ўсёй друкаванай кніжнай прадукцыі Магілёўшчыны 2-й паловы ХІХ – пачатку ХХ ст. прыходзілася на Магілёўскую губернскую друкарню. Выпушчаныя ёю выданні вылучаліся багатай тэматычнай разнастайнасцю. Тут друкаваліся газета “Могилёвские губернские ведомости” (1838–1917), у тым ліку асобныя выданні некаторых публікацый газеты (выйшла 25 кніг), “Памятные книжки Могилёвской губернии” (1861–1916), штогадовы даведнік “Обзор Могилёвской губернии” (1879–1915). Акрамя гэтага, выдаваліся афіцыйныя матэрыялы губернскага праўлення, мясцовых дзяржаўных устаноў і грамадскіх арганізацый, губернскага статыстычнага камітэта: агляды і статыстычныя табліцы, спісы населеных пунктаў, звесткі аб складзе насельніцтва, матэрыялы сходаў і з’ездаў, справаздачы, бібліяграфічныя каталогі і інш.
За перыяд з 1861 па 1917 г. друкарня выпусціла больш за 200 назваў кніг рознага тыпу і зместу, у асноўным свецкай тэматыкі. Найбольш цікавыя з выдадзеных кніг – працы па гісторыі, археалогіі і этнаграфіі краю: “Исторический очерк Могилёвской губернии” М. Фурсава (1882), “Дневник курганных раскопок, сделанных … в течение лета 1892 г. в уездах Рогачёвском, Быховском, Климовичском, Чериковском и Мстиславском” М. Фурсава і С. Чалоўскага (1892), збор гістарычных матэрыялаў “Могилёвская старина” пад рэдакцыяй Е. Раманава (вып. 1–3, 1900–1903), “Историческая справка Могилёвской мужской гимназии, 1809–1909” М. Сазонава (1909), “Белыничский Рождество-Богородицкий монастырь” Ф. Жудро (ч. 1–2, 1911), “Опыт описания Могилёвской губернии…” пад рэдакцыяй А. Дамбавецкага (кн. 1–3, 1882–1884) і інш.
Значнымі і каштоўнымі з’яўляюцца выданні гэтай друкарні па гісторыі беларускай этнаграфіі і літаратуры, такія як “Белорусские тексты вертепного действа” (1898) і “Белорусский сборник” Е. Раманава (вып. 6., 1901), “Тарас на Парнасе и другие белорусские стихотворения” (1900–1902) і інш.
Інфармацыю аб Магілёўскай губернскай друкарні можна знайсці таксама ў анлайн-энцыклапедыі “Беларусь у асобах і падзеях”, на сайтах Магілёўскага гарадскога выканаўчага камітэта і інтэрнэт-праекта Магілёўскай абласной бібліятэкі імя У.І. Леніна “Могилёв на Днепре, или История одной губернии”.
Матэрыял пададзены навукова-даследчым аддзелам бібліяграфіі.