У выдавецтве “Беларуская Энцыклапедыя імя Петруся Броўкі” ўбачыла свет кніга “Сімвалы Беларусі”.
Унікальная 224-старонкавая навінка падрыхтавана сумесна з Музеем сучаснай беларускай дзяржаўнасці і прысвячаецца самым значным сімвалам Беларусі, дзякуючы якім нашу краіну ведаюць і цэняць у свеце. У кнізе на трох мовах – беларускай, рускай і англійскай – прадстаўлены больш за 100 аб’ектаў і з’яў.
Гаворка ў выданні не толькі пра дзяржаўныя сімвалы краіны. Значная частка кнігі прысвечана архітэктурным аб’ектам. Сярод узгаданых славутасцей – Нясвіжскі і Мірскі замкі, архітэктурны ансамбль праспекта Незалежнасці ў Мінску, шматфункцыянальны спартыўны комплекс “Мінск-Арэна”, Нацыянальная бібліятэка Беларусі, Вялікі тэатр оперы і балета і многія іншыя. Духоўнымі сімваламі беларускай нацыі лічацца Крыж Еўфрасінні Полацкай, Жыровіцкі абраз Божай Маці, Тураўскае Евангелле, слуцкія паясы і некаторыя іншыя аб’екты. Да сімвалаў беларускай прыроды адносяць бусла, зубра, лён, васілёк, бульбу, а таксама Белавежскую пушчу, Бярэзінскі біясферны запаведнік, Браслаўскія азёры і жамчужыну краіны – возера Нарач.
У кнізе таксама распавядаецца пра людзей, якія сталі сапраўднымі сімваламі Беларусі і праславілі краіну далёка за яе межамі. Гэта пісьменнікі Максім Багдановіч, Янка Купала, Якуб Колас, Уладзімір Караткевіч, мастакі Іван Хруцкі, Марк Шагал, Міхаіл Савіцкі, спартсмены Руслан Салей, Дар’я Домрачава і іншыя.
У выдавецтве мяркуюць, што кніга прыйдзецца даспадобы ўсім, хто цікавіцца гісторыяй і сучаснасцю беларускай дзяржавы, гасцям і жыхарам краіны.
Аўтар публікацыі: Людміла Мінкевіч.
Крыніца: СБ – Беларусь сегодня
