Арыгінал Гамера ў Беларусі. Яго “Іліяда” цяпер знаходзіцца ў Нацыянальнай бібліятэцы.
Напярэдадні позна вечарам рэйсам з Франкфурта прызямліўся асабліва каштоўны груз – шэдэўры сусветнай кніжнай спадчыны. Рарытэты суправаджалі давераныя асобы ўладальнікаў. Большасць з іх будуць прадстаўлены публіцы ўпершыню. Пра існаванне многіх экспанатаў даследчыкі і не ведалі. Перагаворы ішлі больш за год. Каля сотні экзэмпляраў у Беларусь дастаўляюцца часткамі з розных кантынентаў. Самыя цэнныя (коштам некалькі мільёнаў еўра) ужо ў нас. Усе іх можна будзе ўбачыць на выстаўцы “Беларусь і Біблія”. Яшчэ ніколі і нідзе ў Еўропе ў адным месцы не выстаўлялася такая колькасць кніжных помнікаў.
Алесь Суша, намеснік дырэктара Нацыянальнай бібліятэкі Беларусі:
“Пераважна гэта прыватныя зборы. Гэта не дзяржаўныя закрытыя калекцыі або ўсім добра вядомыя экспанаты сусветнай значнасці, гэта ўнікумы, якія нярэдка да гэтага часу ніхто не бачыў. На выстаўцы будзе магчымасць убачыць каштоўныя помнікі, якім некалькі тысяч гадоў і якія маюць каштоўнасць у дзясяткі мільёнаў еўра за кожную адзінку. Абсалютна непаўторная, унікальная выстаўка, і я да гэтага часу не веру, што мы маем гэта ў Беларусі”.
Выстаўка адкрыецца 20 верасня. Кніжныя шэдэўры будуць знаходзіцца ў Беларусі месяц. Звычайна яны экспануюцца не больш за два тыдні. Пасля Мінска частка калекцыі адправіцца ў Расію. Сусветная кніжная спадчына будзе прадстаўлена ў піцерскім Эрмітажы.
Глядзіце відэасюжэт на сайце Белтэлерадыёкампаніі.
Крыніца: Белтэлерадыёкампанія