З грэчаскай мовы слова “паэзія” (ποίησις) перакладаецца як творчасць.
Напярэдадні Сусветнага дня паэзіі, які можна лічыць святам усіх, хто займаецца творчасцю, Літаратурны музей Максіма Багдановіча запрасіў ахвотных на адмысловую імпрэзу. У ёй прынялі ўдзел беларускія паэты, пісьменнікі, музыкі, якія па сваёй асноўнай прафесіі не звязаны з мастацтвам слова.
Вядома, што Максім Багдановіч, нягледзячы на жаданне вучыцца філалогіі ў Санкт-Пецярбургу і нават маючы рэкамендацыю ад супрацоўнікаў “Нашай нівы”, вымушаны быў згодна з рашэннем бацькі атрымліваць прафесію юрыста ў яраслаўскім Дзямідаўскім юрыдычным ліцэі. Тым не менш гэта не перашкодзіла будучаму класіку беларускай літаратуры сур’ёзна займацца творчасцю і дасягнуць у ёй сапраўдных вяршынь.
Сваімі сакрэтамі, як спалучаць у наш час творчасць і прозу жыцця падзяліліся Андрэй Адамовіч, Георгій Барташ, Павел Касцюкевіч, Уладзімір Пыльчанка, Цімох Авілін, Павел Селівончык, Сяргей Башлыкевіч.
Спецыяльна да Дня паэзіі была створана мастацка-дакументальная выстаўка “Гімн жыцця”, прысвечаная вершу Максіма Багдановіча “Маладыя гады”, які датуецца ўмоўна 1915–1916 гг. Гэты твор лічыцца адным з яго апошніх вершаў пра каханне.
19 сакавіка Дзяржаўны літаратурны музей Янкі Купалы запрасіў на традыцыйнае мерапрыемства “Ноч літаратуры”, прымеркаванае да Міжнароднага дня паэзіі. Адбылася прэзентацыя шрыфту “piasniar”, створанага на аснове рукапісаў Янкі Купалы з фондаў музея, на якой:
- былі прадстаўлены аўтары праекта: маладыя і крэатыўныя дызайнеры і праграмісты;
- графолаг падзяліўся меркаваннем ці раскрывае почырк таямніцы характару Песняра;
- кожны атрымаў магчымасць напісаць колькі слоў почыркам Янкі Купалы – вершы, віншаванні, лісты сябрам і многае іншае з дапамогай трафарэтаў;
- кожны мог праверыць сваю эрудыцыю і паспрабаваць адказаць на пытанні віктарыны “10 цікавых фактаў з жыцця і творчасці Песняра” і атрымаць каштоўныя падарункі з аўтографам Янкі Купалы ад “Maiki.by”.
Аздобай вечара стала беларускае жывое слова ад паэтаў і музыкаў.
Дзень паэзіі “Где жизнь, там и поэзия”, прысвечаны Сусветнаму дню паэзіі, прайшоў у баранавіцкай Цэнтральнай гарадской бібліятэцы імя В. Таўлая. На працягу дня ў фонавым рэжыме гучалі вершы беларускіх паэтаў ў выкананні вядомых дзеячаў мастацтва нашай краіны (запіс з CD-дыска “Сучасная беларуская паэзія”). Паэтычная паліца “Стих – это та же музыка…” пазнаёміла наведвальнікаў з багатай калекцыяй паэтычных твораў з фонду бібліятэкі. Усе, хто наведаў у гэты дзень абанемент бібліятэкі, змог пакінуць сваё меркаванне наконт любімага паэта, узяўшы ўдзел у акцыі-рэйтынгу самых папулярных паэтаў.
Паэтычны вечар “Вершы крочаць па планеце”, прысвечаны Сусветнаму дню паэзіі, адбыўся ў чытальнай зале. На вечары была прадстаўлена паэзія баранавіцкай паэтэсы, мастачкі, члена баранавіцкага літаратурнага аб’яднання “Ліра”, удзельніка народнага клуба бардаўскай песні “Ваганты” Галіны Ліс. Галіна Іванаўна прапанавала на суд слухачоў свае вершы, што ўвайшлі ў тры раней выдадзеныя зборнікі яе паэзіі і новыя. Гучалі і вершы іншых баранавіцкіх паэтаў – Р. Раманчук, Л. Шувалавай, А. Белага і інш. Песні на іх вершы выканалі ўдзельнікі аматарскіх аб’яднанняў “Беспокойные сердца” і “Ваганты”.
26 сакавіка а 16-й гадзіне літаратурны клуб “Шчырасць” запрашае ў бібліятэку № 22 г. Мінска на паэтычна-музычную імпрэзу “Прамяністае святло таленту” да Сусветнага дня паэзі з удзелам паэта, празаіка, публіцыста, грамадскага дзеяча Навума Гальпяровіча.
Чытайце таксама:
- 21 марта отмечается Всемирный день поэзии
- Всемирный день поэзии – 2013
- Трепетный голос поэзии
- Всемирный день поэзии – 2012
- Лучшее лекарство в пилюлях – поэзия!
- Выставка «Магия поэзии»
- Всемирный день поэзии – 2011
- День поэзии в Москве растянется на месяц
- Всемирный день поэзии – 2010
- Всемирный день поэзии – 2009