З 11 па 18 жніўня ў г. Сан-Хуан (Пуэрта-Рыка) адбыўся Міжнародны бібліятэчны і інфармацыйны кангрэс і 77-я Генеральная канферэнцыя ІФЛА.
Дэвіз сёлетняй канферэнцыі – “Бібліятэкі больш чым бібліятэкі: інтэграцыя, інавацыя і інфармацыя для ўсіх”.
Створаная ў 1927 г. Міжнародная федэрацыя бібліятэчных асацыяцый і ўстаноў (ІФЛА) сёння з’яўляецца найбольш аўтарытэтнай і прадстаўнічай няўрадавай міжнароднай арганізацыяй у галіне бібліятэчнага справы.
У рабоце 77-й Генеральнай канферэнцыі і Савеце ІФЛА ўзялі ўдзел каля 2 000 прадстаўнікоў бібліятэчна-інфармацыйных устаноў. Самымі шматлікімі былі дэлегацыі ЗША (каля 160 чал.), Турцыі (120 чал), Канады (70 чал.) і Кітая (40 чал.). Краіны СНД былі прадстаўлены бібліятэкамі Расіі (40 чал.), Украіны (2 чал.), Беларусі і Казахстана – па 1 чалавеку.
У інфармацыйным кангрэсе, пасяджэнні ўдзельнікаў краін СНД, а таксама Канферэнцыі дырэктараў нацыянальных бібліятэк (CDNL) узяў удзел Р.С. Матульскі, дырэктар Нацыянальнай бібліятэкі Беларусі.
На канферэнцыі ІФЛА абмяркоўваліся актуальныя праблемы бібліятэчнага справы:
- заканадаўства ў галіне аўтарскага права і інтэлектуальнай уласнасці;
- фарміраванне электронных бібліятэк (ЭБ);
- развіццё бібліятэк у мультыкультурным асяроддзі;
- барацьба з тэрарызмам, стварэнне бяспекі і свабода доступу да інфармацыі.
Р.С. Матульскі як прэзідэнт НП “Бібліятэчная асамблея Еўразіі” (БАЕ) узначаліў нараду прадстаўнікоў бібліятэк краін СНД (Caucus CIS meeting), на якой з вітальным словам выступіў сёлета абраны прэзідэнт ІФЛА Інгрыд Парэнд (Канада).
У рамках Генеральнай канферэнцыі і Савета ІФЛА адбылося штогадовае пасяджэнне Канферэнцыі дырэктараў нацыянальных бібліятэк (CDNL), прысвечанае асаблівасцям стварэння нацыянальных электронных бібліятэк (НЭБ). У паведамленнях дакладчыкаў было адзначана, што шэраг еўрапейскіх краін, нараўне з традыцыйнымі дакументамі (творы друку, аўдыядакументы і да т. п.), у лік нацыянальных дакументаў уключае таксама тэле- і радыёперадачы, інтэрнэт-сайты і затым архівіруе іх у Нацыянальных электронных бібліятэках.
На традыцыйнай выстаўцы інфармацыйных прадуктаў і тэхнічных сродкаў сёлета былі шырока прадстаўлены новыя распрацоўкі ў галіне сканіравання дакументаў і стварэння ЭБ. Японскія спецыялісты прадэманстравалі цікавую навінку – інтэграваную сістэму, якая дазваляе поўнасцю аўтаматызаваць працэсы захоўвання і выдачы дакументаў карыстальнікам публічных бібліятэк.
У рамках канферэнцыі Р.С. Матульскім былі праведзены перагаворы, кансультацыі і сустрэчы з прадстаўнікамі міжнародных арганізацый, кіраўнікамі бібліятэк і інфармацыйных службаў. Асноўная мэта – далейшае ўзмацненне ўзаемадзеяння ў галіне стварэння, набыцця і выкарыстання інфармацыйных рэсурсаў.
Сярод важных вынікаў удзелу ў канферэнцыі ІФЛА можна вылучыць:
- удакладненне падыходаў па перадачы электронных копій нацыянальных дакументаў для фарміравання Сусветнай лічбавай бібліятэкі;
- дасягненне дамоўленасці аб запрашэнні Нацыянальнай бібліятэкі Беларусі (НББ) да ўдзелу ў праекце “Europeana” па стварэнні Еўрапейскай лічбавай бібліятэкі;
- абмеркаванне падыходаў (тэматычнага і відавага) па наступным развіцці электроннай бібліятэкі СНД “Залатая калекцыя Еўразіі”;
- прапанова аб далучэнні НББ да балтыйскіх праектаў па алічбоўцы дакументаў і стварэнні электроннай бібліятэкі;
- удакладненне асаблівасцей абмену электроннымі копіямі дакументаў з нацыянальнымі бібліятэкамі Расіі, Польшчы і Літвы.
Таксама неабходна адзначыць, што была атрымана высокая ацэнка OCLC якасці генерыраваных НББ бібліяграфічных запісаў і пацверджана іх поўная адпаведнасць міжнародным стандартам. Дасягнута дамоўленасць аб неабходнасці актыўнага абмеркавання юрыдычных і эканамічных аспектаў далейшага ўзаемадзеяння з OCLC.