27 студзеня ў галерэі “Ракурс” адбылася літаратурна-творчая сустрэча ў рамках адкрыцця кніжна-ілюстрацыйнай выстаўкі “Вялікі талент, вялікая праца, вялікае сэрца”.
Сустрэча была прысвечана лаўрэатам прэміі “За духоўнае адраджэнне” і спецыяльнай прэміі Прэзідэнта Рэспублікі Беларусь дзеячам культуры і мастацтва 2010 года.
Прэмія “За духоўнае адраджэнне” і спецыяльныя прэміі Прэзідэнта Рэспублікі Беларусь дзеячам культуры і мастацтва прысуджаюцца штогод за выдатныя творы літаратуры і мастацтва, актыўную падзвіжніцкую дзейнасць у гуманітарнай галіне, накіраваную на развіццё і ўмацаванне духоўных каштоўнасцей.
Нацыянальная бібліятэка Беларусі традыцыйна арганізавала выстаўку матэрыялаў са сваіх калекцый, прысвечаную лаўрэатам, якія сваім мастацтвам і плённай працай славяць нашу краіну. У экспазіцыю ўвайшлі кнігі, выяўленчыя матэрыялы (плакаты, фота, паштоўкі), ноты, перыядычныя і электронныя выданні.
Гасцей выстаўкі і лаўрэатаў прэміі “За духоўнае адраджэнне” і спецыяльнай прэміі Прэзідэнта Рэспублікі Беларусь дзеячам культуры і мастацтва 2010 года вітаў дырэктар Нацыянальнай бібліятэкі Беларусі Раман Матульскі.
Госці мерапрыемства пазнаёміліся з лаўрэатамі, даведаліся пра іх дзейнасць, праекты, планы, дасягненні. Творчымі выступленнямі прысутных парадавалі заслужаны аматарскі калектыў Рэспублікі Беларусь – ансамбль беларускай песні “Церніца” мінскага Палаца культуры і спорту чыгуначнікаў і баяністы аркестра народных інструментаў імя Л.Л. Іванова Магілёўскай абласной філармоніі Пётр Войчанка і Валерый Рулеў.
Кніжна-ілюстрацыйная выстаўка “Вялікі талент, вялікая праца, вялікае сэрца” будзе дэманстравацца да 27 лютага ў кальцавым калідоры 3-га паверха Нацыянальнай бібліятэкі Беларусі.