25 чэрвеня ў рамках рабочага візіту ў Рэспубліку Беларусь Нацыянальную бібліятэку наведаў кіраўнік адміністрацыі Растоўскай вобласці Расійскай Федэрацыі У.Ф. Чуб.
Для яго была арганізавана аглядная экскурсія, у ходзе якой былі прадэманстраваны архітэктурна-будаўнічыя асаблівасці новага будынка бібліятэкі і афармлення яго інтэр’ераў. Ганаровы госць пазнаёміўся з дзейнасцю бібліятэкі па абслугоўванні чытачоў, яе інфармацыйнымі рэсурсамі, тэхнічным абсталяваннем, у прыватнасці, сістэмай дастаўкі дакументаў з вышыннага сховішча.
З агляднай пляцоўкі бібліятэкі спадар Чуб змог палюбавацца відам сталіцы. У музеі кнігі ўвазе госця была прадстаўлена калекцыя рарытэтных выданняў з фондаў Нацыянальнай бібліятэкі Беларусі. У.Ф. Чуб зрабіў запіс у кнізе ганаровых гасцей, выказаўшы сваё захапленне ўбачаным і адзначыўшы, што радуецца “разам з братнім народам Беларусі, што гісторыя і сучаснасць даступна для ўсіх, хто жыве, у тым ліку і ў Растоўскай вобласці, дзякуючы кіраўніцтву рэспублікі і работнікам бібліятэкі”.
Губернатар пажадаў калектыву бібліятэкі дабрабыту і прафесійных поспехаў, а таксама ўнёс уклад ў папаўненне бібліятэчнага фонду, падарыўшы некалькі новых выданняў.
 |
 |
 |
