21 лютага 2020 г. у сярэдняй школе № 68 г. Мінска прайшла IV Адкрытая рэспубліканская вочна-завочная навукова-практычная канферэнцыя “На карысць Радзімы і чалавека!” з міжнародным удзелам.
Арганізатарамі канферэнцыі выступілі Мінскі гарадскі выканаўчы камітэт, Беларускі дзяржаўны ўніверсітэт, Акадэмія Міністэрства ўнутраных спраў Рэспублікі Беларусь, упраўленне па адукацыі адміністрацыі Заводскага раёна г. Мінска, Мінскі гарадскі інстытут развіцця адукацыі.
Ад Нацыянальнай бібліятэкі Беларусі ўдзельнікаў павіталі загадчык аддзела карпаратыўнага ўзаемадзеяння Марына Рудакоўская і галоўны спецыяліст Руслан Доўгі. Яны распавялі юным удзельнікам канферэнцыі аб магчымасцях віртуальнага выкарыстання інфармацыйных рэсурсаў Нацыянальнай бібліятэкі – тэматычнага сайта “Беларусь у інфармацыйнай прасторы” і праекце “100 дзён да Вялікай Перамогі. Па старонках беларускіх газет 1945 г.”.
У канферэнцыі ўзялі ўдзел больш за 100 навучэнцаў 7–11 класаў школ і кадэцкіх вучылішч Мінска, абласных гарадоў, Жлобіна, Барысава, Ваўкавыска, Ганцавічаў, Мікашэвічаў і іншых беларускіх гарадоў, а таксама навучэнцы Спецыялізаванага ліцэя Міністэрства ўнутраных спраў Рэспублікі Беларусь. У рэжыме анлайн да канферэнцыі далучыліся навучэнцы кадэцкіх школ і карпусоў з Масквы і Тамбова.
На суд журы дзеці прадставілі свае даследчыя праекты, прысвечаныя захаванню гістарычнай памяці аб падзеях Вялікай Айчыннай вайны 1941–1945 гг. і вывучэнню малой радзімы.
Матэрыял прадастаўлены аддзелам карпаратыўнага ўзаемадзеяння.