4 снежня а 14-й гадзіне ладзіцца ўрачысты запуск друкавання факсіміле аднаго са старажытнейшых помнікаў айчыннай кніжнай культуры – знакамітага Полацкага Евангелля канца ХІІ – пачатку ХІІІ ст.
Акцыя адбудзецца ў рамках Года кнігі і прымеркавана да 1150-годдзя Полацка. Гэты праект з’яўляецца вынікам сумеснай пяцігадовай дзейнасці Нацыянальнай бібліятэкі Беларусі, Нацыянальнай акадэміі навук Беларусі, выдавецтва Беларускага экзархата і Міжнароднага дабрачыннага фонду “Сям’я – Яднанне – Айчына”.
Полацкае Евангелле – унікальны помнік славянскага пісьменства, які самім фактам свайго існавання сведчыць пра старажытнасць праваслаўных традыцый на беларускай зямлі. У Старажытнай Русі галоўнай кнігай у кожным храме было напрастольнае Евангелле. Менавіта такую высокую ролю галоўнай кнігі храма іграла Полацкае Евангелле ў самым старажытным горадзе Беларусі.
Па форме Полацкае Евангелле прадстаўляе сабой рукапісную кнігу ў выглядзе кодэкса, якая складаецца з 172 лістоў пергаменту. Тэкст рукапісу напісаны прыгожым уставам – старажытнай формай кірыліцы, якая выкарыстоўвалася ў ранніх рукапісах як від найбольш урачыстага пісьма. Мова Евангелля царкоўнаславянская, аднак відавочныя некаторыя лакальныя асаблівасці беларускага лексічнага каларыту. Для мастацкага аздаблення тэксту выкарыстаны застаўкі, арнаментаваныя ініцыялы і мастацкія загалоўкі. Вялікую цікавасць прадстаўляюць таксама нататкі і ўкладныя запісы палачан ХІІІ–XIV стст., якія захавалі асаблівасці жывой мовы нашых продкаў.
Сёння гэта першакніга беларускага народа знаходзіцца па-за межамі Беларусі і мала даступная нават даследчыкам. Асноўная частка гэтага ўнікальнага помніка нашай кніжнасці захоўваецца ў зборы Расійскай нацыянальнай бібліятэкі ў Санкт-Пецярбургу, а яшчэ два лісты – у фондах Расійскай дзяржаўнай бібліятэкі ў Маскве.
Факсімільнае ўзнаўленне дазволіць максімальна аўтэнтычна аднавіць знешні выгляд і арыгінальную структуру кніжнага помніка, а таксама вярнуць яго ў культурную прастору нашай Айчыны, зрабіць яго сапраўды нацыянальным набыткам. Факсімільнае выданне дэманструе багацце і старажытнасць духоўнай культуры Беларусі, яно дазваляе пазнаёміцца са старажытным шэдэўрам самаму шырокаму колу грамадсткасці.
Урачыстае друкаванне першага аркуша адбудзецца з удзелам асноўных арганізатараў праекта ў Тэхнічным цэнтры “СНАМИ” (г. Мінск, вул. Фабрычная, д. 22, п. 333).
Кантактны тэлефон: (8 017) 293 27 56.