2 сакавіка ў бібліятэцы адбудзецца вернісаж Уладзіміра Акулава "Імгненні жыцця”.
Вядомы беларускі мастак-авангардыст Уладзімір Акулаў з'яўляецца нязменным прадаўжальнікам традыцый Казіміра Малевіча і Марка Шагала. Яго работы асабліва актуальныя сёння – ім уласцівая жывапісная дынаміка, характэрная для нашага часу, які хутка змяняецца, выразныя колеры, нечаканыя формы і нетрывіяльныя рашэнні.
З 1985 года найбольш буйныя персанальныя выстаўкі Уладзіміра Акулава прайшлі ў Нацыянальным цэнтры сучасных мастацтваў, Нацыянальным музеі гісторыі і культуры, Музеі сучаснага выяўленчага мастацтва, Пасольстве Рэспублікі Эквадор у Беларусі, музеі “Садовае кальцо” ў Маскве, а таксама ў г. Ватэрлоа ў Бельгіі. Яго работы прадстаўлены не толькі ў музеях, але і ў прыватных калекцыях у Беларусі, Расіі, Бельгіі, Польшчы, Германіі, Італіі, Украіне.
У экспазіцыі – работы з маштабных тэматычных цыклаў “Маскі і вобразы”, “Вайна”, “Вялікія людзі”, “Анімалістычны цыкл”, “Футбалісты” і інш. Да ўвагі наведвальнікаў прапанаваны пейзажы, нацюрморты, партрэты гістарычных асоб, аўтапартрэты, а таксама анімалістычныя малюнкі не зусім звычайных жывёл – напрыклад, з чалавечымі вачамі! Словам, эксперымент, асацыятыўнасць і яркасць уражанняў. Вось такая яна – “нерэальная” рэальнасць Уладзіміра Акулава! Дакрануцца да яе і трапіць у свет мастака-авангардыста можна да 1 мая 2017 года.
Пачатак мерапрыемства а 17-й гадзіне ў галерэі “Лабірынт” (3-ці паверх).
Дата заканчэння выстаўкі можа быць зменена.
Удакладняйце інфармацыю па тэлефоне: (8 017) 266 37 37.
