28 лютага ў Нацыянальнай бібліятэцы Беларусі праходзіць фінальны тур рэспубліканскага маладзёжнага праекта “100 ідэй для Беларусі” за 2022 год.
Арганізатарам рэспубліканскага праекта з’яўляецца грамадскае аб’яднанне “Беларускі рэспубліканскі саюз моладзі”. Мэта праекта – актываваць дзейнасць маладых вучоных і вынаходнікаў у галіне інавацыйнай дзейнасці, павысіць матывацыю маладых спецыялістаў, занятых стварэннем інавацыйных тэхналогій і прадуктаў, стварыць пляцоўку для зносін і абмену вопытам удзельнікаў праекта.
У бібліятэцы на працягу дня працавалі экспазіцыя пераможцаў XXIX Рэспубліканскага конкурсу навуковых работ студэнтаў і інтэрактыўныя пляцоўкі. Наведвальнікі маглі ўбачыць работы канкурсантаў на выставе маладзёжных інавацыйных праектаў.
Цяпер фіналісты прадстаўляюць экспертнаму савету 129 праектаў у намінацыях “Прамысловасць”, “Біятэхналогіі”, “Медыцына”, “IT-тэхналогіі”, “Сацыяльная сфера”, “Эканамічныя праекты” і інш.
Пасля пасяджэння рэспубліканскага экспертнага савета і падвядзення вынікаў адбудзецца цырымонія ўрачыстага закрыцця праекта “100 ідэй для Беларусі” за 2022 год з узнагароджаннем пераможцаў.
Азнаёміцца з лепшымі ідэямі для развіцця нашай краіны можна на сайце БРСМ.
Матэрыял пададзены аддзелам сувязей з грамадскасцю.
