Фонд Нацыянальнай бібліятэкі папоўніўся ўнікальным навукова-папулярным выданнем аб шматгадовай гісторыі будаўніцтва і мадэрнізацыі Брэсцкай крэпасці.
“Атлас крепости Брест-Литовск. Том 3. Фортовый период (1876–1915)” быў перададзены ў дар бібліятэцы Фондам развіцця Брэсцкай крэпасці падчас прэзентацыі, якая прайшла ў Доме дружбы народаў.
У кнізе змешчаны раней невядомыя матэрыялы, якія захоўваюцца пад грыфам "сакрэтна" ў найбуйнейшых ваенных архівах і музеях Масквы і Санкт-Пецярбурга. У атлас таксама ўвайшлі дакументы са збораў Нацыянальнай бібліятэкі Польшчы, мемарыяльнага комплексу “Брэсцкая крэпасць-герой” і прыватных калекцый, большасць з якіх апублікавана ўпершыню.
3-ці том атласа прысвечаны фортам і ўмацаванням крэпасці Брэст-Літоўск (1876–1915). Архіўныя картаграфічныя матэрыялы і фатаграфіі пазнаёмяць чытача як з сярэдневяковым Берасцем, так і падзеямі Першай сусветнай вайны на гэтых землях, а сучасныя мастацкія фота злучаць мінулае з сённяшнім днём.
Карыстаючыся атласам, можна вывучыць генеральныя планы крэпасці, чарцяжы асобных ўмацаванняў і фотадакументы. У лічбах гэта – 54 карты праспектаў і планаў збудаванняў, 63 сучасныя фатаграфіі і больш за 50 гістарычных здымкаў.
Кніга будзе цікавая гісторыкам, краязнаўцам, спецыялістам па ахове гістарычнай спадчыны, архітэктарам, музейным работнікам, архівістам і бібліятэкарам, спецыялістам па турызме, выкладчыкам і студэнтам. Зараз аматары гісторыі, турысты і наведвальнікі Брэсцкай крэпасці даведаюцца ўсё пра яе будаўніцтва, абсталяванне, артылерыю, пазнаёмяцца са знакавымі персаналіямі і новымі інжынернымі рашэннямі, якія паўплывалі на развіццё крэпасці.