23 сакавіка ў канферэнц-зале Нацыянальнай бібліятэкі Беларусі ладзілася творчая сустрэча з аўтарамі мастацкага праекта “Спадчына Беларусі”.
Яго аўтары –журналісты Белтэлерадыёкампаніі Аляксандр Аляксееў і Алег Лукашэвіч. Сустрэча была арганізавана ў рамках грамадскага абмеркавання кандыдатаў для вылучэння на атрыманне Дзяржаўнай прэміі Рэспублікі Беларусь у галіне літаратуры, мастацтва і архітэктуры 2010 года.
Мастацкі праект уключае самыя запатрабаваныя прадстаўніцкія фотаальбомы: “Спадчына Беларусі” (2004 г.), “Наследие Беларуси” (2006 г.), “Спадчына Беларусі. Скарбы” (2007 г.), агульны тыраж якіх перавысіў 30 000 экзэмпляраў; 17 серый тэлевізійнага дакументальнага цыкла “Эпоха” пра знакамітых людзей, якія нарадзіліся на тэрыторыі Беларусі; 11 нацыянальных і міжнародных фотавыставак у нашай краіне і Арменіі, Францыі, Вялікабрытаніі, Польшчы, Італіі.
Сустрэча з маладымі аўтарамі прайшла ў цёплай сяброўскай абстаноўцы. Аляксандр Аляксееў і Алег Лукашэвіч паведамілі гасцям пра гісторыю стварэння праекта, пра тыя змены, якія адбыліся за час працы з іх унутраным светам, пра тое, як зноўку адкрывалі для сябе Беларусь, яе багатую гісторыю і культуру. Аўтары падзяліліся сваімі творчымі планамі, адказалі на пытанні, якія паступілі з залы.
Падчас мерапрыемства трансляваліся фрагменты з тэлевізійнага дакументальнага цыклу “Эпоха” і ілюстрацыі з альбомаў “Спадчына Беларусі” і “Спадчына Беларусі. Скарбы”. Усе прысутныя змаглі азнаёміцца са зместам гэтых унікальных выданняў, якія сёння прадстаўлены ў найбуйнейшых бібліятэках свету, прэстыжных універсітэтах, культурных і дыпламатычных установах, прыватных калекцыях знакамітых людзей.
У творчай сустрэчы прынялі ўдзел больш за 400 чалавек, сярод якіх студэнты Беларускай дзяржаўнай акадэміі мастацтваў, Беларускага дзяржаўнага універсітэта, Інстытута сучасных ведаў імя А.М. Шырокава, Ваеннай акадэміі Рэспублікі Беларусь, а таксама тыя, хто цікавіцца гісторыяй, культурай і традыцыямі роднай Беларусі.