16 красавіка ў рамках двухбаковага супрацоўніцтва адбыліся трэнінг і прэзентацыя інфармацыйных рэсурсаў і сэрвісаў Нацыянальнай бібліятэкі Беларусі для дзвюх зборных груп студэнтаў розных спецыяльнасцей Мінскага дзяржаўнага лінгвістычнага ўніверсітэта.
Першая частка заняткаў уключала прэзентацыі інфармацыйных рэсурсаў і сэрвісаў Нацыянальнай бібліятэкі Беларусі ў дапамогу адукацыйнаму працэсу, а другая – трэнінгі, накіраваныя на фарміраванне практычных уменняў пошуку інфармацыі ў галіне мовазнаўства з улікам патрабаванняў лінгвістычнай падрыхтоўкі. Падчас заняткаў студэнты атрымалі шырокае ўяўленне аб магчымасцях выкарыстання інтэрнэт-партала бібліятэкі, асаблівасцях пошуку і сартавання бібліяграфічных запісаў у розных рэсурсах.
Навучэнцы наведалі цэнтральны падсобны фонд і кафедру выдачы літаратуры агульнай чытальнай залы, зону каталогаў і картатэк. Іх увазе былі прадстаўлены картачны алфавітны каталог кніг на замежных мовах і матэрыялы ў галіне мовазнаўства сістэматычнай картатэкі артыкулаў. Актуальнасць выкарыстання картачнай бібліяграфіі пацвярджаецца адсутнасцю адлюстравання дадзенай бібліяграфіі ў электронных інфармацыйных рэсурсах.
Нашы патэнцыйныя чытачы азнаёміліся з традыцыйнымі і электроннымі рэсурсамі Нацыянальнай бібліятэкі Беларусі, магчымасцямі рэгістрацыі на партале і платформах закупляемых рэсурсаў для аддаленага заказу друкаваных дакументаў і чытання электронных анлайн, падбору і рэдагавання спісаў літаратуры да навуковых прац, выкарыстання бясплатных віртуальных даведачных службаў, праверкі тэкстаў на наяўнасць запазычанняў у сістэмах “Антыплагіят” і “ПлагіятКантроль”, аддаленай дастаўкі лічбавых копій фрагментаў дакументаў. (На сайце апублікаваны прэйскурант платных паслуг.)
E-mail: osio@nlb.by.
Матэрыял пададзены аддзелам даведачна-інфармацыйнага абслугоўвання.
