4 красавіка ў бібліятэцы студэнты 1-га курса факультэта пачатковай адукацыі Беларускага дзяржаўнага педагагічнага ўніверсітэта імя М. Танка віртуальна прайшлі жыццёвымі дарогамі Марка Шагала.
Такую магчымасць яны атрымалі падчас экскурсіі з цыклу “Славутыя імёны Бацькаўшчыны”, прысвечанай творчасці выдатнага мастака. Экскурсанты даведаліся пра магчымасці бібліятэкі як сацыякультурнага цэнтра, пазнаёміліся з кнігамі і альбомамі пра творчую спадчыну мастака, а падчас дэманстрацыі электроннай прэзентацыі акунуліся ў яркі, дзіўны і зачаравальны свет, створаны на палотнах Маркам Шагалам.
Будучыя педагогі нават адчулі сябе мастакамі – стварылі карціну, выкарыстоўваючы вобразы твораў майстра. У канцы экскрусіі яны наведалі выстаўку музея кнігі “Беларускі буквар: 400 гадоў гісторыі”.
А хто з праслаўленых беларусаў нарадзіўся ў вашых краях? У Год малой радзімы прапануем пашырыць свае веды пра іх! Без сумнення, мы зможам у гэтым дапамагчы. Прыходзьце ў бібліятэку на экскурсіі па творчасці Янкі Купалы, Якуба Коласа, Янкі Маўра, Міхася Зарэцкага, Максіма Багдановіча, Кандрата Крапівы, Францыска Скарыны і даведайцеся больш пра вядомых землякоў і месцы на карце Беларусі і свету, звязаныя з іх жыццём.
