Нацыянальная бібліятэка Беларусі запрашае да супрацоўніцтва спецыялістаў у галіне бібліятэчнай справы і інфармацыйных тэхналогій, выкладчыкаў, аспірантаў і магістрантаў, кіраўнікоў органаў кіравання культуры.
Зборнік артыкулаў з’яўляецца навуковым выданнем, якое рэцэнзуецца і ўключана ў Пералік навуковых выданняў Рэспублікі Беларусь для апублікавання вынікаў дысертацыйных даследаванняў па педагагічных, гістарычных навуках і культуралогіі.
“Бібліятэчны веснік” прыцягвае ўвагу да пытанняў захавання і вывучэння сусветнай культурнай спадчыны, праблем функцыянавання бібліятэк на сучасным гістарычным этапе, пошуку перспектыўных шляхоў развіцця, пашырэння міжкультурнага ўзаемадзеяння і супрацоўніцтва паміж установамі культуры, адукацыі, навукі.
У зборніку будуць разгледжаны праблемы заканадаўчай, нарматыўнай і рэгламентуючай базы бібліятэчнай практыкі; фарміравання інфармацыйных рэсурсаў і асаблівасцей захавання фондаў; арганізацыі інфармацыйна-бібліятэчнага і сацыякультурнага абслугоўвання карыстальнікаў; правядзення і каардынацыі навуковых даследаванняў; прымянення сучасных тэхналогій у стварэнні інфармацыйнай прадукцыі, распрацоўцы комплексу інфармацыйна-тэхналагічных сістэм, прафесіяналізацыі бібліятэчных кадраў Беларусі і інш.
На старонках навуковага выдання будуць прадстаўлены матэрыялы беларускіх і замежных аўтараў, карысныя спецыялістам у галіне бібліятэчнай справы, інфармацыйных тэхналогій, гісторыі, культуралогіі.
Матэрыял пададзены навукова-даследчым аддзелам бібліятэказнаўства.
