Студзень – асаблівы месяц у жыцці студэнтаў, час напружанай вучобы і падрыхтоўкі да здачы курсавых работ, залікаў і экзаменаў. Нацыянальная бібліятэка прапануе правесці гэты час максімальна эфектыўна і падрыхтавацца да здачы сесійных выпрабаванняў на “выдатна”.
Для гэтага прадстаўляем вам лепшыя ліцэнзійныя электронныя навучальныя дапаможнікі і матэрыялы.
Электронна-бібліятэчная сістэма (ЭБС) “Універсітэцкая бібліятэка анлайн” змяшчае навучальныя дапаможнікі і перыядычныя выданні, а таксама відэа-, аўдыяматэрыялы і ілюстраваныя выданні. Скарыстайцеся электроннымі кнігамі па гуманітарных і прыродазнаўчых дысцыплінах, эканоміцы, кіраванні, ахове здароўя, архітэктуры і будаўніцтве, інфармацыйных тэхналогіях.
ЭБС “Знаниум” прадастаўляе анлайн-доступ да літаратуры холдынгу “ИНФРА-М” і іншых аўтарытэтных выдавецтваў. Гэта лічбавыя версіі падручнікаў, навучальных дапаможнікаў для вышэйшай і сярэдняй адукацыі, навуковыя манаграфіі і часопісныя артыкулы – політэматычны кантэнт для навучэнцаў гуманітарных, тэхнічных, прыродазнаўчых і медыцынскіх спецыяльнасцей.
ЭБС “БиблиоРоссика” прызначана для даследчыкаў, выкладчыкаў і студэнтаў і змяшчае калекцыі актуальнай навуковай і вучэбнай літаратуры па гуманітарных, тэхнічных і прыродазнаўчых навуках. Акрамя гэтага, тут вы знойдзеце навукова-папулярную, мастацкую літаратуру і нон-фікшн.
На платформе ЭБС “Лань” даступны спецыялізаваныя выдавецкія калекцыі кніг і падручнікаў па мастацтвазнаўстве і музыказнаўстве, сацыяльна-гуманітарных і эканамічных дысцыплінах.
Электронная бібліятэка “Grebennikon” – карысны рэсурс для будучых маркетолагаў, эканамістаў, кадравых работнікаў, менеджараў. Змяшчае артыкулы, апублікаваныя ў спецыялізаваных часопісах Выдавецкага дома “Гребенников”, а таксама тэматычныя матэрыялы шэрагу выдавецтваў.
Гэтыя і многія іншыя інфармацыйныя рэсурсы даступныя для вас у рэжыме анлайн днём і ноччу, у нашых утульных чытальных залах або ў іншым зручным для вас месцы. Па пытаннях доступу да рэсурсаў звяртайцеся да бібліятэкараў вашай чытальнай залы.
Жадаем вам удала здаць сесію!
Матэрыял пададзены аддзелам карпаратыўнага ўзаемадзеяння.