24 кастрычніка ў бібліятэцы адбылася прэзентацыя кнігі “Эра независимости” Прэзідэнта Рэспублікі Казахстан Нурсултана Абішавіча Назарбаева.
Аўтарству дзяржаўнага і палітычнага дзеяча, першага Прэзідэнта Рэспублікі Казахстан Нурсултана Назарбаева належыць больш за 30 кніг. “Эра независимости” адлюстроўвае гады, калі прымаліся найважнейшыя рашэнні, ад якіх залежаў далейшы шлях развіцця краіны.
Напісаная ў жанры гістарычнай публіцыстыкі кніга паказвае аўтарскі погляд на найнавейшую гісторыю Казахстана і яго будучыню, характарызуе этапы будаўніцтва суверэннай дзяржавы з моманту яе заснавання, адлюстроўвае сутнасць казахстанскай мадэлі эканамічнага і палітычнага развіцця, дае аналіз новых прыярытэтаў на этапе развіцця ва ўмовах новай глабальнай рэальнасці.
Выхад у свет кнігі “Эра независимости” стаў знамянальнай падзеяй для шырокага круга чытачоў, моладзі, прадстаўнікоў навуковай грамадскасці Казахстана.
Урачыстае мерапрыемства адкрыў Надзвычайны і Паўнамоцны Пасол Рэспублікі Казахстан у Рэспубліцы Беларусь Ермухамет Кабідзінавіч Ертысбаеў. У рамках прэзентацыі ён падарыў бібліятэцы некалькі кніг: “Эра независимости” Прэзідэнта Рэспублікі Казахстан Нурсултана Назарбаева, “Казахстан и Назарбаев: логика перемен” Ермухамета Ертысбаева і “Евразийская интеграция” Таіра Мансурава. Ермухамет Ертысбаеў таксама распавёў аб дзейнасці Прэзідэнта Казахстана і адзначыў, што "яго грандыёзныя рэформы дазволілі пабудаваць новую краіну".
Намеснік дырэктара Нацыянальнай бібліятэкі Беларусі па інфармацыйных рэсурсах Таццяна Васільеўна Кузьмініч падзякавала Ермухамету Кабідзінавічу за выдатны падарунак і нагадала прысутным, што Нацыянальную бібліятэку Беларусі і нацыянальныя бібліятэкі Казахстана звязваюць моцныя сяброўскія адносіны.
Таксама ў прэзентацыі прыняў удзел Надзвычайны і Паўнамоцны Пасол Азербайджанскай Рэспублікі ў Рэспубліцы Беларусь Латыф Сейфаддзін аглу Гандзілаў. Ён распавёў пра сяброўства паміж Казахстанам і Азербайджанам, ролі Прэзідэнта Казахстана ў развіцці сваёй краіны, адзначыўшы, што “Нурсултан Абішавіч Назарбаеў з'яўляецца найвялікшым палітыкам сучаснасці”.
Кнігу Прэзідэнта Рэспублікі Казахстан Нурсултана Абішавіча Назарбаева “Эра независимости”, а таксама іншыя падораныя выданні чытачы змогуць убачыць на кніжных паліцах бібліятэкі ў бліжэйшы час.